Nongpoh, Jylliew 12: U MLA ka Nongpoh u Bah Mayral Born Syiem ha ka sngi Palei u la leit ban aiti dalade ïa ki skhim pynroi sha ki 7 tylli ki shnong khappud ka Nongpoh Constituency ba la mang lyngba ka Inter State Border Area Development Program kaba dei ka skhim kyrpang na ka bynta ki nongshong shnong ha ki shnong khappud ka jylla kaba la sdang ban treikam na ka bynta ka jingmyntoi jong ki paidbah.
Kitei ki shnong kiba la ïoh jingmyntoi lyngba katei ka skhim ki kynthup ïa ka shnong Jowe, Pahamjri, Belkuri, Khulia, Rongsahep, Khuswai bad ka shnong Rongthaluh ha kaba ka jingmang pisa baroh ka la kot kumba T. 21 lak bad na ka liang u MLA u la aiti ruh da ki work order sha ki nongïalam shnong kiba kynthup naduh ka jingpynbha ïa ki madan ïalehkai, ki ïing Dorbar, ki kamra klas ba thymmai, ka jingkieng wah kaba pynïasoh bad ka jylla Assam, ka ïing ap kali bad kiwei kiwei.
Nalor kitei ki kam pynroi, u Bah Mayralborn Syiem u la ïoh ruh ban ïa shong phylliew jingmut bad ki nongshong shnong bad ban sngap ruh ïa kiwei kiwei pat ki jingud jingnam la pynpaw da ki nongïalam shnong na ka bynta ban nang kyntiew shuh shuh bad ban dang wanrah shuh shuh ki kam pynroi sha ki shnong khappud.
Haba kren ha katei ka sngi u Bah Mayral Born Syiem u la pynpaw ka jingsngewkmen hadien ba kum u MLA dalade u la ïoh ban leit ïuhkjat sha kitei ki shnong khappud bad ban aiti ruh ïa ki kam pynroi bapher bapher ban sa pyntrei ha kitei ki shnong khappud ryngkat ka jingkyrmen skhem ba kitei ki skhim kin long shisha ka jingkyrkhu bad ka jingmyntoi sha ki paidbah bad kyrpad ruh ba kin pyntrei hok ïa ka kam na ka bynta ka jingmyntoi lang jong baroh.
U la ong ruh ba ka jingleit ban pynpoi ïa ki kam pynroi sha ki shnong khappud kan dang bteng ha ki sngi ban dang wan namar ka Nongpoh Constituency ka don kumba 45-50km eiei ka khappud bad ka Assam bad lyngba katei ka skhim kan long shisha ka jingmyntoi bad ka jingkyrkhu ïa ki paidbah bad kum u MLA u la leit ruh ban sngew ban sngap ïa ka sur ki paidbah ban tip ruh ïa ka jingeh jong ki bad ki jingdonkam kiba hakhmat jong ki.
