Da ki kali kit nongpang ai ka Seng Samla kur Sohbar sha ki shnong ka thaiñ Shallang

Nongstoiñ, Jylliew 7: Ki khun samla na ka kur Sohbar kiba na ka thaiñ Shallang West Khasi Hills District, hapoh ka jingïalam jong u samla Franklin Sohbar President ka Seng Samla Kur Sohbar, hynnin ka sngi kaba dei ka 6 tarik u jylliew bad mynta ka 7 tarik u Jylliew ki la ïoh ban pyllait paidbah ïa ki ar tylli ki kali kit nongpang ha ka thaiñ. Kawei na kitei ki kali la ai sha ka shnong Kyllon Mathei (san kilo) bad kawei pat ïa ka shnong Sohbar kaba don ha sor Shallang, ha kaba u Ma Belington Sohbar Rangbah Kur ka Kur Sohbar, kum ka dak jong ka jingpyllait paidbah, u la ïoh ban khap ïa u ribbon jong ka kali kaba la ai sha ka shnong Kyllon Mathei.
Katba u ma Francis Sohbar Secretary ka kur u la khap ïa u ribbon ka kali jong ka shnong Shallang Sohbar (A) bad u samla Franklin Sohbar President ka Seng Samla Kur Sohbar, u la ïoh ban aiti ïa u shabi jong ka kali ha u rangbah shnong jong ka shnong Kyllon Mathei bad ha u rangbah shnong ka shnong Sohbar Shallang.Baroh ar tylli kitei ki kali kiba la tip kyrteng kum ki Ecco, ki la kot sha ki 16 lak tam ei ei bad ki dei ruh kiba dang thymmai, ïa kiba la thied da kaba synñiang pisa lang da ki khun samla jong ka Kur Sohbar, ryngkat ka jingïasnohktilang ruh bad kiwei kiwei ki riew rangbah jong ka thaiñ, kynthup ruh ki nongkhaïi kiba ju trei ïa ki kam ka khaïi pateng ha ka khyndew ka shyiap ka Kur Sohbar.
Nalor ka kali, kitei ki samla Kur ki ai ruh mar kawei kawei ka Generator ha baroh ar tylli ki shnong ba kitei ki shnong kin ïoh ban pyndonkam ha ka por ba duh ka bording jingshai. Ha kitei ki baroh ar ki jingïalang la ïadonlang ruh u bah Evarish Sohbar rangbah shnong ka shnong Kyllon Mathei, u bah James Sohbar rangbah shnong ka shnong Sohbar bad kiwei kiwei ki riew rangbah jong ka thaiñ, kynthup ruh u bah Gigur Myrthong u ba la wan ban ïa sakhi lang ïa katei ka sngi, kum uwei na ki nongshong shnong jong ka shnong Kyllon Mathei.
Ha baroh ar ki jingïalang kiba lyngkot, la pynshit pynshngaiñ da ki jingshad na ki khun samla kumjuh ki jingrwai kyrpang kiba la rwai ha ka ktien Lyngngam.