Da ki kali elektrik wad lad ka sorkar Meghalaya ban pynïaid noh ha nongbah Shillong

Shillong, Naitung 09 : Ka sorkar jylla mynta ka don mynta ha ka jingthmu ban pyrshang pynïaid noh da ki kali elektrik (electric vehicle) ha nongbah Shillong da kaba buh hakhmat eh ba kane kan ïarap ban lait na ka lyer jaboh kaba ju mih na ki kali.
Watla ka sorkar Meghalaya ka la wallam da ka Meghalaya Electric Vehicle Policy 2021 kaban sa kut noh ha u Lber jong u 2026, hynrei la ïohi pat ba ka jingpyndonkam jong ki paidbah ïa kine ki kali elektrik ka duna haduh katta katta.
Kumta, na ka liang u Secretary ka tnad Transport jong ka sorkar jylla, u DD Sangma haba kren ha ka workshop ba shisngi kaba long ha kane ka sngi Balang ha Nongbah Shillong u la kubur ba kadei ka jingshisha ba ka jingpyndonkam ïa kali elektrik ha ka jylla ki duna bha watla na ka sorkar ka la pynbna da song kyrpang na ka bynta ki paidbah kiba jied ban pyndonkam ïa kine ki jait kali.
“Ki don bun ki daw kiba pynlong ïa ki paidbah ban jied ïa ki kali elektrik hynrei kane kam dei pat ban pynduh mynsiem ïangi,” bynrap biang utei u heh sorkar ha katei ka rynsan ïatai kaba la pynlong halor ka phang pdeng, “Electrifying Shillong: Accelerating EV Adoption & Charging Infrastructure.”
Shuh shuh u ong ruh ba ka tnad ka la shim ruh ïa ka sienjam ban pynsngewthuh ïa ki paidbah khnang ba kin phaikhmat noh sha kine ki kali elektrik da kaba buh hakhmat ïa ka dheng kali bad khamtam eh ïa ka jingkhuid jingsuba ka lyer bad ki sawdong sawkun namar ki kali elektrik kim buh jingma satia ïa ka lyer bad ruh ïa ka jingsawa.
Nangta u ong ruh ba lada ki paidbah ki phaikhmat noh na ka kali petrol bad diesel sha ka kali elektrik kane kan plie lad ruh ïa ki samla ha ka ïohkam ïohjam namar kin sa mih bun ki kam kiba ïadei bad kane ka jingpyrshang kaba thymmai.
Katkum ka jingong jong u, ki khmih lynti ba kane ka sien pyrshang kaba mynta kan pynlong ïa kiwei pat ki jylla ban phaikhmat sha ka Meghalaya kum ka nongmuna.
Haba bynrap lang, u Assistant Commissioner ka tnad Transport Bah AD Tyngkan u la ong ba na ka bynta ka nongbah Shillong lada ki paidbah ki jied noh da ki kali elektrik, ka jingkylla kan long da kumwei pat ha kaba ka leit ka wan ha ki jaka sor kan long ha ka rukom kaba kham pher.
Katkum ka jingong jong u, ha Shillong hi kiba bun ka leit ka wan jong ki paidbah kadei tang najan hajan bad kumta kane kan ïahap bha ïa ki ban pyndonkam da ki kali elektrik kum ki kali ar shaka bad lai shaka wat da ki kali kamai ruh.
Tangba u ong pat ba ïa mynta hi, bun ki paidbah kim pat sa sngew mon ban pyndonkam da kaba buh hakhmat ïa ka rukom treikam ki bateri lada leh da ka bording, katno kin neh kumno ban leh bad kumta ter ter kiba dang donkam shibun bha ban pynshai paidbah.
Na ka liang kine ki ophisar ki la pynpaw ruh ba watla katta ka jingpyndonkam kali elektrik da ki paidbah ka jylla kala nang kiew mynta bad ki khmih lynti ba nangne shakhmat kan kiew arshah da ka jingïatrei lang na baorh ki liang.
Ïa kane ka prokram la pynlong da ka jingïatrei lang bad ka Convergence Energy Services Limited (CESL) kumjuh ka Ernst & Young LLP (EY LLP) nalor ka Asian Development Bank (ADB).
Ha kane ka sngi la ïoh ruh ïa ka jingpynshai kaba kham bniah na u Head of Commercial jong ka CESL u Amit Sood nalor kiwei kiwei ki nongkren.