Shillong, Naitung 10: Ka seng Bharatiya Janata Party (BJP) Meghalaya unit ka la rakhe ïa ka Guru Purnima, kaba dei ka jingrakhe kaba kyrpang hapoh ka kolshor jong ka ri India, ha kaba ha kane ka prokram la pynkup burom ïa ki nongïalam niam bad ki nonghikai kiba la nohsynniang shibun ha la ki jong ki jong ki bynta.
Kum shi bynta na ka jingrakhe ha ka ri baroh kawei, ka seng BJP state unit ka la leh burom ruh ïa ki riew shimet kiba la pass bha ha ka pule puthi, kiba la paw ha ki kam ïalehkai bad kiwei ki rynsan.
Ha kane ka prokram u Lat ka jylla u C.H. Vijayashankar u la pynkupburom ïa u Principal ba la shong thait u Protima Das bad ka nonghikai kaba la slem bha ka kong Sunita Lyngdoh kaba hikai ha Shillong Higher Secondary School bad ïa kane ka jingpynkup burom la leh hapoh ka prokram ba la pynlong ka ïing jong u Lat ha Raj Bhawan.
La pynkup burom ruh ïa u Rapheal Sun, u nongïalehkai karate ba tbit bha bad ïa kane la leh halor ki jingjop jong u ha ka Zonal, National, bad International Karate Championship.
Ki nongïalam ba la ih bha ka seng BJP, ba kynthup ïa u State President Rikman Momin, u Myntri ka sorkar jylla u Bah A.L. Hek, bad u nongaiktien ba rangbah ka BJP u Bah M.K. Kharkrang, ki la ïashim bynta lang ha kane ka prokram pynkup burom bad ki la ai burom ruh ïa kiba la ïoh ïa ki khusnam.
