Shillong, Risaw 14: Ka Social Cultural and Sports Club Wahmawleiñ kaba hap ha Mawkynrew C&RD Block East Khasi Hills District ha ka 11 tarik Risaw 2024 ka la ïoh ban pynlong ïa ki jingpynïalehkai kynjat bol bad ka prokram pyni ïa la ki sap ha Tukhon Playground (Jongksha).
La sdang ïa ka prokram ha katei ka sngi da ka phainal U-10 jong ka Jongksha Grassroots Center hapdeng ka Nangkiew FC pyrshah ïa ka Rising FC ha kaba ka Rising FC ka la lah ban pynliem ïa ka Nangkiew FC lyngba ka penalty da 5-4.
Kawei pat ka jingïalehkai phainal U-12 hapdeng ka Maitshaphrang FC pyrshah ïa ka Ïatyllilang SC, ha kaba ka Ïatyllilang SC Ka la jop lyngba ka penalty “da 5-3.
Khatduh ha katei ka sngi la pynlong ïa ka jingïakob pyni ïa la ki sap da ki jingshad ha kaba ka samla Risakmen Khongrymmai ka la jop ïa ka nam ba nyngkong, ka Lawanhun & Banyllla Nongspung ïa ka nam ba ar bad u Damelapynskhem Khongsngi u la jop ïa ka nam ba lai. Ha katei ka jingïakob shad ki don ba baroh 180 ngut kiba ïashim bynta.
Ha katei ka sngi la long kongsan da u Bah Olet Kharsahnoh Sordar shnong Jongksha, Bah “Tympang Pohshna Chairman Mawkynrew Block, u samla Wellborn Mynsong (Paheh), Kong Ravelin kharmuti, Bah S, kshiar President Wahmawleiñ SC, kiwei de ki nongkitkam ka SS&SC Wahmawleiñ, ki heprit bad kiwei kiwei.
