Da ki jingïakhih ba tyngeh lada ka sorkar ka dang buhteng ban pynbeit ïa Langpih Sector

Nongstoiñ, Ïaïong 09: Namar ka jingpynsahteng jong ka sorkar ban pynbeit ïa ka Langpih sector ka jaka ïa kajia pud kaba la neh da ki phew snem, ki nongïalam jong ka Raidmynsaw ha jingïalang paitbah ha phyllaw jong ka Raidmynsaw Upper & Secondary school ha Langpih ha kane ka sngi balang ka 9 tarik Ïaïong, ki la shim ka rai ban sdang pynlong noh da ki jingïakhih kiba tyngeh lada ka sorkar ka dang buhteng ban pynbeit ïa Langpih Sector.
Ha kane ka jinglang kaba ki la khot lang ruh ïa baroh ki nongïalam jong ki seng saiñ pyrthei, ki nongsynshar shnong, ki paitbah nongshong shnong Khasi bad Garo kiba shong hapoh u pud u sam jong ki shnong kiba hap ha ka Langpih sector, ki la poi lut.
Hynrei na ka liang ki nongïalam jong ki seng saiñ pyrthei pat kiba la poi ki long tang u bah Lurshai Kharbani MDC ka Rambrai Jyrngam, bah Bony Roy Lyngdoh Lyngkhoi kyrtong MDC jong ka VPP ha kane ka Election ba la dep bad u bah K.P.Pangñiang MLA/MDC barim ka Rambrai Jyrngam, ki sordar jong ki shnong kiba don ha katei ka thaiñ bad kiwei kiwei.
Ha katei ka sngi la pynïaid ïa ka jingïalang da u bah Hindro Samakha Chairman jong ka Raidmynsaw, u ba la phah pynmynjur ruh sha ki paidbah ba dei ban khang lut noh shwa baroh ki kam pynroi jong ka Assam, katba ym pat lah ban pynbeit pud.
La ïoh ïa ka jingkren na ki riew rangbah, ki nongsynshar shnong bad ki nongïalam jong ki seng saiñ pyrthei jong katei ka jaka kiba la shah khot sngewbha sha katei ka jingïalang.
Jan baroh ki nongkren ki la pynsngew ka dei halor ka jingïatylli bad baroh ki nongkren ki la pynsngew ruh ba wat la ki don ha la ki jong ki jong ki seng saiñ pyrthei. Hynrei kim shym la don kano kano ka jingsngew ïapher namar ka Election ka la kut bad na ka bynta ban ïoh noh ïa la u jong u pud u sam u ba thikna donkam ka jingïatylli lang kawei.
Hadien ka jingpynshai jong kitei ki riew rangbah, ka jingïalang ka la ïakut ruh ban phah da ka jingthoh sha u Conrad Kongal Sangma Myntri Rangbah ka jylla, ba un pynsngew sha ka sorkar Assam bad ka sorkar Meghalaya, ba kin pyndep noh ban pynbeit ïa u pud u sam jong ka Langpih sector kumba ki la wan ban pynlong jingïalang ha ka 16 tarik Naiwieng 2022 ha Langpih.
Nalor kata ka jingïalang ka la rai ruh ba hadien ba la pynpoi ïa katei ka jingthoh sha u Myntri Rangbah, lada ka sorkar ka dang pynslem bad pynbeit ïa u pud u sam, kin pynlong da ki jingïakhih kiba jur bad ki lah ban leit tur ruh shaduh Secretariat ban pynsngew ïa ka jingdawa.