Da ki jingduwai bad jingïaid paidbah yn pynlong ka Balang Catholic halor ka jingïa umsnam ha Manipur

Tura, Jylliew 17: Ki Balang Catholic kiba don ha rilum Garo, mynta ka sngi Saitjaiñ ki la ïakynduh lang ha Bishop House, Tura ban ïakren ha kaba ïadei bad ka jingjia kaba ktah ïa ki paidbah jong ka jylla Manipur namar ka jingïaum snam kaba dang bteng haduh mynta.
Ha kane ka jingïalang la wan ban ïa shim bynta da ki nongïalam ka Balang Catholic na ki Parish bapher bapher kiba don ha nongbah Tura, kynthup na ki Cathedral, Sacred Heart, Tura, Araimile, Danakgre bad Walbakgre, ha kaba la ïa donlang ki Bishop jongka Tura, u Most Rev. Andrew R. Marak bad Most Rev. Jose Chirackal.
Ka jingthmu jong kane ka jingïalang ka long ban ïatai halor ka jinglong jingman ha ka jylla Manipur kaba la ktah bha ïa ki paidbah lyngba ka jingmih jong ka jingïaumsnam.
Ki nongïalam Balang ki la shim ïa ka rai ban shimkhia bad ban leh eiei ha kaba ïadei bad ka jingeh kaba mih na katei ka jingïakynad bad ki la don ïa ka jingthmu ban buh jingduwai kyrpang na ka bynta ki paidbah kiba shah ktah bad ban pan ïa ka bor na u Blei ba yn tuklar bad ïarap ha kum kane ka por kaba mynta.
Nalor kane, yn pynlong ruh ïa ki Rally Paidbah kum ka lynti ban pyni ïa ka jingdon ïa ka jingsngewlem na ka bynta kito kiba la shah ktah na katei ka jingïaumsnam bad kine ki Rally ki dei da ka jingthmu ban pynsngewthuh ïa ki paidbah ïa ka jingjia bad kumjuh ban pyni ba ka Balang ka ai ïa ka jingkyrshan ban wanrah ïa ka jingsuk, jingbishar hok bad ban pynkut noh ïa ka jingïakynad.
Da ka jingmih ryntih ki paidbah, ki ngeit skhem ba kin ai mynsiem ban don ka jingïatylli bad ka jingpynkhiah ïa kito ki jaidbynriew kiba la mad ïa ka jingshem lanot.
Ka long ruh kaba ai mynsiem ban ïohi ba ki nongïalam jong ki Balang Catholic ki la mih shakhmat ban shimkhia ïa ka mat kaba ktah ïa ka imlang sahlang bad ka jingpyrshang ka jongki ka pyni ba ki don ïa ka jingkitkhlieh ban kyntiew ïa ka jingsuk, jingbishar hok bad ban sngewlem ïa ki briew kiba la mad ïa ka jingeh bad jingjynjar kaba khraw.