Nongpoh, Naiwieng 06: Ban dang ïai kyrshan ïa kito kiba don hapdeng ka jingpang TB na ka bynta ban ioh ïa ki jingbam kiba tei met, ka ophis ka District Tuberculosis Ophisar, Ribhoi District katkum ka thong jongka ka Pradhan Mantri TB Mukt Bharat Abhiyaan (PMTBMBA) ka la bteng biang ban pynbiang ïa ki jingbam ba tei met na ka bynta kito kiba don ka jingpang TBbad kiba dang don hapdeng ka jingsumar ba hap ha ka Byrnihat PHC.
Kane ka jinglah ban sam ïa ki jingbam tei met sha ki ba pang TB, ka dei ruh lyngba ka jingshim khia ka ophis u Deputy Commissioner ka Ri Bhoi u Abhilash Baranwal, uba la kloi ban shim khia na ka bynta ba ïa kren ïa ki nongpynïaid Petrol Pump ba kynthup naduh ka HPCL, BPCL bad ka IOCL kiba la ïarap ban kyrshan da ki jingbam na ka bynta kito kiba don hapdeng jingsumar na ka jingshah ktah ha ka jingpang TB.
Haba sam ïa kine ki jingbam tei met mynta ka sngi ha Dorbar Hall ka Shnong Harlibagan la don lang u Deputy Commissioner ka Ri Bhoi u Abhilash Baranwal, u S. Kumar, Divisional Head ka IOCL, Guwhati, u E Pradhan, Assistant Commissioner ka Ri Bhoi, u Bah R.C Lyngdoh, Superintendent ka Excise, ka Dr. E. Kawaing, District Tuberculosis Officer ka Ri Bhoi, ki trai petrol pump bad Manager ryngkat kitei kiba don ha ka jingshah sumar na ka jingpang TB.
Kane ka jingsam marbam sha kiba pang TB ka dei ruh ka sien jam kaba ar, hadien ba la dep sam ïa ki jingbam tei met sha kito kiba pang TB ha Umsning TB Unit ba la kyrshan da kitei ki Company naduh ka IOCL, BPCL bad ka HPCL bad lyngba jong kane ka sngi ka la dang ai mynsiem ruh ïa kito kiba pang TB ba ki trai jong ki Wine Store ki la kyrang ba pynbiang ïa ki jingbam ba tei met sha ki 47 ngut ki ba pang TB ba hap ha ka Byrnihat PHC.
Haba ai jingkren ha kane ka sngi, u Deputy Commissioner ka Ri Bhoi u Abhilash Bawanwal u la pynpaw ïa ka mynsiem jong ka jingkmen, ha kaba nalor ka thong jong ka sorkar lyngba ka Pradhan Mantri TB Mukt Bharat Abhiyaan, ki la don ruh ki Company kiba mih shakhmat ban kyrshan lem ïa ki jingbam tei met na ka bynta kito kiba pang TB ha kane ka District.
Shuh shuh, lyngba ka thong jongka Pradhan Mantri TB Mukt Bharat Abhiyaan ka long ban pynduhjaid ïa ka jingpang TB ha ka ri bad donkam pat ban don ka jingïatrei lang na baroh ki liang bad lada don ka jingïatrei lang lah ban pynjaid ïa kane ka jingpang kaba de ka jaid jingpang kaba lah ban sumar bad ruh lada kito kiba pang TB kin pyndep ïa ka jingdih dawai kumba la bthah da ki Doctor, u la bynrap.
