Da ki hostel kynthei man ki distrik, kdew ka Mangtyngka jong ka Sorkar Pdeng

New Delhi, Rymphang 01 : : Ka Myntri ba peit ïa ka Platyngka jong ka Sorkar Pdeng, ka Nirmala Sitharaman ha ka sngi U Blei ka la wanrah ïa ka Mangtyngka kaba 53.47 klur tyngka na ka bynta ka samoi treikam jong u snem 2026 – 27, kaba la kiew da 7.7 persen na ka mangtyngka jong u snem ba la dep.
Ka Myntri haba wanrah ïa ka Mangtyngka jong u snem 2026-27, ka la ong ba ka sorkar ka thmu ban tei da ka hostel kynthei ha manla ki distrik jong ka Ri khnang ban pynsuk bad wanrah ka sawdong sawkun kaba shngain na ka bynta ki khynnah kynthei haki jaka pule.
Kumban shu kdew hangne, ki don haduh palat 700 tylli ki distrik ha ka ri baroh kawei.
La ong ba kane ka thong ka long ban kyrshan ïa ki khynnah kynthei na ki jaka nongkyndong bad kumjuh na ki jaka khap sor kiba hap ban ïaid jngai na ka bynta ban bteng ïa ki jingpule kiba kham shajrong bad kumjuh ki jinghikai pyntbit, tang na ka daw bym don ki jaka pule ha ki shnong jong ki.
Nalor kata, ka Myntri ka la pynbna ruh ba kin don haduh san tylli ki skulbah ha kito ki jaka ba bun ki karkhana bad ki jaka ba long pdeng bad long iew, nangta yn sa buh ruh ïa ki content creator lab ha ki 15,000 tylli ki skul bad 500 tylli ki college nalor ba yn pynduna ïa ka jinglum khajna naduh jaka (tax collection at source) ne TCS ha ka 2 persen na ka bynta ka pule puthi.
Kane ka tnad ka ïoh ruh ïa ka mangtyngka kaba 1.39 lak klur tyngka kynthup ïa ka 55,727 klur tyngka na ka bynta ki higher education.
Ha kajuh ka por ka Myntri ka la pynbna ruh ba ka sorkar pdeng kan kyrshan ruh ïa ki sorkar jylla ha kaban shna ïa kine ki san tylli ki skul bah ha kito ki jaka ba longpdeng.
“Kine ki jaka ba thmu ban don ïa ki jaka pule kin don ïa bun tylli ki skulbah, ki college, bad ki jaka wad bniah, ki jaka ai jingpyntbit bad kumjuh ki jaka sah,” ka la ong haba wanrah ïa ka Mangtyngka.
“Haba phai sha ki kyrdan kiba kham heh, ka jingdonkam ban pynlut bun kynta ha ki jaka pule bad ki laboratory ka wanrah jingeh ïa ki khynnah kynthei. Kumta ka mangtyngka ka tyrwa ban don noh kawei kawei ka girl’s hostel ha man la ki distrik,” ka la ong.
Ha kane ka mangtyngka, la kdew ruh ba yn kyrshan ïa ka Indian Institute of Creative Technologies, Mumbai, na ka bynta ban don ïa ki content labs ha ki 15,000 tylli ki secondary school.
“Ka ai jingkyrshan ïa ka pule puthi bad ka jingthaw kam thaw jam bad ka pyni ïa ka jingthmu na ka bynta ka bynta ka jingroi ïa kaban sa wan. La tyrwa ïa ki jingbei tyngka kiba kham heh bad kham shlur ban pynkhlain ïa ka pule puthi bad pyntbit ïa ki ki sap ha kylleng ki bynta jong ka ri India,” ka la ong.
Ka Mangtyngka ka kdew ruh ban don ïa ka National Institute of Design (NID) kaba thymmai ha ki bynta phang mihngi jong ka Ri.