Nongpoh, Risaw 28: Da ki hajar tylli ki han ba phylla ki la wan poi ha ka por shiteng synñia kiba her ha ka sahit bneng ha ka 25 tarik u Risaw 2024 ha ka Shnong Klew bad kane ka jingwan poi kitei ki han ba phylla ka la pynkhihwin ïa ki paidbah nongshong shnong ban mih shabat shiteng synniang namar ba ki la duh ïa ka thiah ka dem na ka daw ka jingpah kitei ki han kiba her ha sahit bneng.
Kane ka jingwan poi kitei ki Han ka dei ha ka shnong Klew, ha kab shiteng synñia ki la shu pah bad kaba la sawa ruh ha shnong ha thaw haduh ba ki paidbah ki la khie na kiba thiah ban sakhi ïa kane ka jingwan poi kitei ki han ba phylla.
Kumba la ïoh lum jingtip, la ong ba kiba bun kitei ki han ki la leit phet baing hadien ka jingher ha ki bytna jong katei ka shnong, hynrei kawei na ka Han ka la hap ha pynthor kba bad sahkut, haduh ba kam lah shuh ban her biang bad ka la shu pah ha katei ka pynthor kba kaba la pynlong ïa uwei u nongshong shnong ban leit pynlait im.
Haba ïa kren bad ki Nongthoh Khubor, u Bah Lamburom Masharing, u Rangbah ka shnong klew ba hap ha ka Raid Madan Kyrdem, Ri Bhoi District, u la ong ba kane ka jingwan poi kitei ki Han ba phylla ka la pynlyngngoh shisha ïa kiba bun ki paidbah Nongshong shnong, namar shiteng synñia kitei ki sim ki pah bad haba la mih shabar la lap ba ki la ïa her da ki hajar tylli ha ka sahit bneng.
U ïathuh ruh kitei ki han ki ba her ki la shuh pah lut ha ki bynta jong katei ka shnong bad kitei ki han ba la kot da ki hajar ki la phet biang na katei ka jaka ba ki wan her, hynrei kawei na ka han ka la hap ha pynthor kba bad sahkut haduh ba la hap ban pynlait da u Adrinshon Sohiong ba kam lah shuh ban her biang kumba kiwei kiwei ki la phet na katei jaka.
U la ïathuh ruh ïa katei ka Han ba la ïoh ban pynlait im, la ai ka jingsumar bad ka jingïada ha ka jaka kaba biang bad ka dorbar shnong ka la dep ruh ban mana ïa ki nongshong shnong ba kim dei ban pynïap lada ki lap ne ïoh kem ïa kitei ki Han.
Shuh shuh, u la bynrap ruh kumba ka shnong ka la ïoh ban pynlait im ïa katei kawei ka han ba sahkut ha pynthor kba lyngba utei u rangbah, ka shnong bad utei u rangbah ki la rai ruh ban leit aiti sha ka tnad Wildlife ba kin leh katkum ki kyndon ain kinba ïa dei bad ki sim ki doh ne ki mrad ki mreng, u la bynrap.
