Shillong, Nailur 11 : U Symbud Myntri Rangbah ka Jylla, Bah Prestone Tynsong ha ka sngi Palei u la pyntip halor ka jingïaid ka kam kaba ïadei bad ka jingshna ïa ki surok lyngba Pradhan Mantri Gram Sadak Yojana (PMGSY) ha ka Jylla.
Katkum ka jubab ba la wanrah hapoh Ïing Dorbar ha kane ka sngi Palei, la ïathuh ba hapoh ka PMGSY -1 na ki 1079 tylli ki surok, haduh 1063 tylli kidei kiba la dep, bad kiba dang don mynta ha ka jingpyntrei ki long 10 tylli.
La kdew ruh ba hapoh ka PMGSY-2, na ki 94 tylli ki surok, 90 tylli ki dei kiba la dep bad kiba sah ki don sa tang lai tylli ki bym pat dep.
Nangta ha ka PMGSY-III, na ki 141 tylli ki surok, 29 tylli ki surok la pyndep. Ki don 26 tylli ki surok kiba dang don ha ka jingpyntrei bad 86 tylli ki surok kiba dang shu sdang trei namar ki dei kiba dang shu aiti kam ha u Rymphang – Jymmang 2025.
Shuh shuh la kdew ruh ba na kine, kawei ka surok bad phra tylli ki jingkieng ki dang don ha ka jingpynkhreh.
La ïathuh ruh ba ha Mawlai, ka don tang kawei ka surok kaba dang trei mynta kaba tip kum ka MRL05-Mawlai sha Lummawsiang ter ter Mawsiatkhnam (L-10.00km), ïa kaba la mang na ka PMGSY-III (2022-23), kaba ka kam ka la ïaid stet shakhmat bad mynta ka la kot sha ka 85 persen ka jingiaid ka kam.
