Da ki hajar tylli ki pung ki don pung ha WKHD katba ki dohkha pat dang wahrah na shabar

Nongstoiñ, Rymphang 02 : Ka jingdonkam dohkha ha West Khasi Hills ka jur bha hynrei haduh mynta ha man la ki ïew ki hat haduh ki dukan ha ki nongkyndong dang hap ban pyndap da ki dohkha kiba la shalan na sha bar jylla.
Haba phai ha ka kam ri dohkha bad ka jingdon jong ki pung ha West Khasi hills haduh mynta ki la don da ki hajar tylli ki pung kiba rit bad bah eh hynrei ki dei tang ki pung na ka bynta ban pynïakop khwai ym ban pynmih dohkha ban die sha ki ïew ki hat.
Haba pyrshang ban twad jingmut na  ki paitbah nong shong shnong kiba don ïa ki pung ri dohkha ki la ong ba ïa  ki skhim ki ïoh na ka sorkar hynrei kim ïoh pat ïa ki jinghikai kumno ban pynroi ïa ki dohkha bad kumno ban pynbha ïa ki pung khnag ba ki dohkha kin roi bha. Ki don pat ki ba ong ba lada baroh ki ba don ia ki pung  ri dohkha ki dei kiba la shah hikai  pyntbit bad kiba la shemphang ha ka kam ri dohkha ka West Khasi Hills ka lah ban dei kawei na ki distrik ka ba lah ban pynmih bun ki dohkha ban die ha ki iew ki hat.
Haba phai ha ka kam ri dohkha ka Fiseries Department  tnad treikam jong ka sorkar ka peit ia kane ka bynta imat ka tlot haduh katta katta bad kam don ruh ia ki nongtrei kiba tbit bad kiba shemphang  ban trei ia ka kam.
Haba phai ha ka jingdon jong ki pung hapoh ka distrik don na ki trai pung  kiba ioh jingiarap na ka Fisheries Department nangta ki don  pat ki pung kiba la shna da ka jingbei pisa jong ka NABARD bad ba la pyntrei da  sorkar lyngba ka ka Soil Conservation , DRDA bad kiwei kiwei.nalor kitei ki pung ba la pyntrei da ka sorkar bad kiba la ioh jingiarap na ka Fisheries ki don ruh ki pung ba ki riewshimet kiba don ia ki jaka kiba biang ki tyllong um ki shna hi na ka bynta ban pynneh ia ka um bad ban ri dohkha ha kajuh ka por.
Haba phai pat ha ka jing don jong  ki wah pat ka West Khasi Hills ka distrik kaba don bun eh ki wah kiba lada ki paitbah nongshong shnong ki ñiewkor bad pyrkhing ban pyniap pathar ia ki doh kha doh pnat kum kaba khang jar, wieh dawai bih, siat bom ki paitbah nong bam kin ïoh pahuh bha ki  dohkha khamtam ha ki aïom lyiur.
Kumta ka por ka la dei ba ka sorkar ba kan peit bniah ba ki nongtrei ha ka Fisheries Deaprment ki dei ban long ki briew kiba la tbit bha ha ka kam  bad ki ba don ka jingkitkhlieh na ka bynta ban ai jinghikai ia ki nongshong shnong kiba la ïoh jingiarap ban shna ia ki pung khnang ba ka skhim kaba la ai ï ki kan ym sep ei.
Nalor kata ba katei ka tnad trei kam kan shim khia ha kaban ai jingiarap ia ki shnong ki thaw kumno  ban sumar ia ki um ki wah na ka bynta  ban pynneh pynsah ia ki dohkha doh pnat bad baroh ki jingthaw kiba im ha poh um khnang ba ki paitbah kin trei shitom bad shimkhia ha katei ka bynta.