Shillong, Nohprah 06: Ka Me’gong Festival 2025 ka la sdang da ka jingshongshit ha ka sngi Thohdieng, ha kaba u Myntri Rangbah ka jylla u Conrad K. Sangma ula plie ïa kane ka jingrakhe ïa kane ka tamasa kaba ïadei bad ka kolshor jong ka rilum Garo kaba la long ha ka sien kaba San.
Ha kane ka sngi sdang la ïohi ba da ki hajar ngut ki paidbah ki la ïatuid sha Tura, kaba la pynlong ïa kane ka tamasa kum kawei na ki bor jong ka jinglong jingman ka kolshor bad ka tamasa ka tem ka put ha ka ri India.
Ha ka sngi sdang la ïoh ïa ka jingpynbyrngia ha ka Aski Stage. U Nongrwai Pop-Rock ba pawnam ha ka pyrthei u Richard Marx ula pynshongshit ïa ki paitbah da ki jingrwai kiba pawnam bad ki jingrwai kiba thymmai na ka thup jingrwai ka jong u ka ban sa pyllait ka ‘Afterhours’.
“Nga dap da ka jingkmen ban don hangne mynta ka miet bad angnud ban ïoh pynbyrngia ha ka Me’gong ha ka sien kaba nyngkong eh,” ula ong ïa ki paidbah kiba pynpaw ïa ka jingrisa.
Hadien kane la ïoh pat ïa ka jingpynbyrngia na ka Neeti Mohan, kaba la pynshongshit ïa ki paidbah lyngba ki jingrwai kiba pawnam kiba kynthup ïa ka Ishq Wala Love, Jiya Re, Tu Hai Toh bad London Thumakda. Da kaba sngewtynnad ïa ka rukom long rukom man ki nongpeitkai, ka la ong, “Balei ngam shim la wan shane mynshwa? Ka long kaba itynnad. Phi long kiba donbok ban im ha ka bneng kaba don ha ka pyrthei”.
Kum ka dak ban ai burom ïa u nongrwai uba pawnam uba la kha hapoh ka jylla Meghalaya u Zubeen Garg, ka Neeti ka la rwai ïa ka jingrwai Mayabini, kaba la pynsngewtynnad bad ïoh ïa ka jingïaroh na baroh ki riewieid jingrwai.
Ka jingshongshit ki paidbah ka la sdang ban jur, haba u Julian Marley ula rwai ïa ki jingrwai ‘Reggae’ katba ka kynhun Nucleya ka la pynkylla ïa katei ka madan kum ka jaka shad ha kaba ki nongpeitkai ki la ïashad da kaba bud ïa ki sur kiba mih na ki jingtem.
Ki nongrwai na ka jylla Meghalaya kiba kynthup ïa ka Haystack Ladies, Strum Stories bad Ahaia ruh ki la pynshongshit ïa ki paidbah kaba la pyniskhem syndon ba ka jylla Meghalaya ka la kiew bha ha ka kolshor jong ka tem ka put bad ka rwai.
Ka la don ruh ïa ka jingpyninam na ki ‘Top 7’ kiba la rung ha ka Final jong ka Chief Minister’s Meghalaya Grassroots Music Project (CM-MGMP) ha kaba ki la ïoh ban shimbynta lang ha katei ka rynsan bad ki kynhun nabar ri bad kane ka la ai mynsiem ïa kine ki kynhun kiba dang shu sdang kum ka Nictophilia, Magnificent Obsession, Necroscope, Emberfall, Imphaled, Misagathia and Rise & Shine.
Ka nongrwai kaba dang 19 snem jong ka CM-MGMP ka Jakrima R Marak ka la ong, “MGMP ka la ïarap ïa ki nongrwai ban kiew shaphrang bad ka la ai ruh ka lad ban leit ïashimbynta ha ki rynsan ha kylleng ki jylla”.
Ka bam ka dih tynrai ruh ka la khring bha ïa ki nongwankai haba ka nongshet jingbam kaba pawnam na Garo Hills kaba la wan baar ha ka Master Chef India Season 8 ka Nambie Jessica Marak ka la long kum ka nongbishar kaba kyrpang.
Ki nongïashim bynta ki la pynkhreh ïa ki jingbam tynrai bad ka jingpynwandur thymmai ïa ka rukom shet da kaba pyndonkam ïa ki jingber kiba na kylleng ka jylla Meghalaya.
Ka Jessica Marak ka la ïaroh ïa ki nongïashim bynta kiba la sdang ban pynkhie im ïa ka rukom shet ka barim bajah bad ban pyninam ïa ka jingriewspah ka rilum Garo ha ka jingshet ïa ki jingbam ki bapher bapher.
Nalor ka tem ka put, ka Me’gong 2025 ka la don ruh ka jingpyninam ïa ka kolshor kaba har rukom. Ki nongwankai kila ïashimbynta ha ki jingïalehkai tynrai kum ka Anding Oka, leit jngohkai ïa ka Brew Village, VR Zone bad ïadonbynta bad ki nongthaiñ kti, nongshad bad ki nongïashim bynta ha ka kolshor ha kylleng ki rynsan.
Ki nongsengkam la jong kiba la ïoh jingkyrshan lyngba ka PRIME Meghalaya ki la pyninam ïa ki jingbam tynrai, ki jingthaiñ, ki jingdih bad ïa ki tiar ki tar kaba la kyntiew ïa ka lad kamai jakpoh.
Ka jingdon bun ki bynta ha ka Me’gong’s kaba kynthup ïa ka jingpynïasoh ïa ki jingthaiñ kti tynrai, ka jingpynmih ïa ki mar kiba la pynwandur kyrpang, ka tem ka put ha ka pyrthei bad kiwei kiwei ki jingpynbyrngia ka la bteng ban pynkhlaiñ ïa ka ïoh ka kot ka Meghalaya ha ka liang ka kolshor.
Kane ka tamasa kan jam sha ka sngi ka baar, ha kaba ha ka Aski Stage yn ïoh ïa ka jingpynbyrngia na ka kynhun Blue, Yellow Claw, Kanika Kapoor bad Prateek Kuhad, katba ha ka Kingfisher Stage yn sakhi ïa ka Hoi Hoi Makbil, G-Hills Finest, Crack Gang, Rough Road bad Nokpante, ryngkat bad ka Cosplay Contest bad kiwei kiwei ki bynta kiba ïadei bad ka kolshor.
