Nongpoh, Nailar 08: Da ki spah ngut ki nongtrei bar jylla ki bym don Labour License, kiba trei bylla ha ki Karkhana bad ki dukan bapher bapher, kiba don ha 13mer, Byrnihat, ki la shah beh noh ha ki dkhot bad ki nongïalam ka FKJGP, Byrnihat Circle, kiba la leit ban khynra Labour License naphang ïa baroh ki nongtrei bar jylla ha katei ka thaiñ.
Ïa katei ka kam ban leit khynra Labour License ïa ki nongtrei bar jylla ha 13mer Byrnihat, la ïalam da u samla Kitborlang Suting, President ka FKJGP Byrnihat Circle, nangta u Samla Artison Khongstid, kaba la synranlang da ki dkhot katei ka Circle bad ki nongïalam ka FKJGP North Khasi Hills District.
Haba kren sha ki lad pathaikhubor, ki nongïalam ka FKJGP Byrnihat Circle, kiba kynthup ïa u samla Kitborlang Suting bad u samla Artison Khongstid, ki la ong ba ka daw kaba la pynlong ïa ka seng ba kin pynlong ïa katei ka jingleit khynra Labour License ha ki Karkhana bad ki dukan bapher bapher, kiba don ha ka thaiñ 13mer Byrnihat, ka dei hadien ba ki la ïoh jingtip halor ka jingdon ki briew kiba nabar, kiba la pyrshang ban bsuh khlieh sha kitei ki jaka, da kaba leh kum ki nongbylla bad kaba long ruh ka jingma na ka jingkhynra mynder ka sorkar Assam kiba wan shong beaiñ ha ka jylla Assam.
Shuh shuh, ki la ong ba kumba baroh ki la tip ba ka sorkar Assam, ka la kyndang naphang ïa baroh ki mynder kiba la shong beaiñ ha ka jylla Assam, kumta halor katei ka jingleh ka Assam, ka pynlong ïa ka seng ba kan hap peitngor bad khamtam eh ba katei ka thaiñ 13mer Byrnihat, ka dei kawei na ki jaka kaba don ha syndah eh bad ka Assam.
Nangne shakhmat, ngin dang pynjur ban khynra ïa ki kot ki sla bad khamtam eh ïa ki Labour License na bynta kito kiba wan trei bylla bad lada ngi lap ba kim don ïa ki kot ki sla bad khamtam eh ïa ki Labour License, na ka liang ka seng ngin ym ailad bad ngin pynher krad beit ïa ki.
Namarkata, kumba mynta ha ka jingjurip ngi la lap ba baroh ki nongtrei ha katei ka jaka kim don ïa ki Labour License, kaba long kum kata ka kot ban pynshisha ba ki don ka hok ba kin long kum kita ki nongtrei bylla, ha kawei pat ka liang, ngi kyntu ïa ka tnat Labour, khnang ba yn ym mih kino kino ki jingjia ba sngewsih, lada ki sengbhalang ki leit ban khynra kot ha ki jaka ba trei da ki bar jylla.
