Da ki hajar mih ki paidbah sha ka rally ka JCMDA

Khliehriat, Ïaïong 07: Da ki hajar hajar ki paidbah na ri lum Jaiñtia khamtam kiba na East Jaiñtia Hills District kiba ju im ja kpoh da kaba tih bad shalan dewïong ki la ïa mih paidbah sha ka rally ba pynlong ha Khliehriat ïa kane ka rally la khot pynlong da ka Jaiñtia Coal Minners and Dealers Association (JCMDA) bad da kawei ka sur ki paidbah ki la pyrta jam “Ko sorkar to plie noh u dewïong” kaba long ruh kum ka jingdawa jong ki na ka sorkar ban plie noh ïa ka jingtih bad shalan dewïong namar kane ka dei ka kam kaba ki ju im ja kpoh bad pyndap pynbiang ïa ka ïing ka sem namar mynta la bun bun snem kata naduh u snem 2014 la khanglad da ka NGT ban tih bad shalan dewïong.
Shuh shuh mynta ka sngi la sakhi ruh ba baroh ki dukan naduh ki dukan heh, ki dukan rit kiba naduh Ladrymbai ter ter shaduh Khliehriat ki la khang lut namar ki nong die dukan ruh ki la wan ban ïa shimbynta lang ha kane ka jingïaid rally paidbah.
Ha shwa ban sdang ïa ka rally ka JCMDA ka la pynlong shwa ïa ka jingïalang paidbah ha madan Teilang Play Ground ha Dkhiah bad nangne pat ki la sdang ban ïa iaid paidbah naduh Dkhiah shaduh ophis u Deputy Commissioner sha Khliehriat bad ki nongialam jong ka Jaiñtia Coal Minners and Dealers Association (JCMDA) ki la aiti ruh ïa ka dorkhas ha kti u Deputy Commissioner ka East Jaiñtia Hills District, u Manish Kumar,IAS bad ïa kane ka dorkhas u DC un sa pynpoi sha u myntri rangbah ka jylla, u Conrad Sangma.
U Vice President jong ka JCMDA, u bah Justine Dkhar uba dei ruh u shongknor ba pyniaid ïa ka jingïalang, u la ong ba halor kane dorkhas ba la aiti ha u Deputy Commissioner, ka JCMDA ka ai por lai bnai ïa ka sorkar ba kan leh ïa kaba donkam lym kumta ka Association kan sa shim da kiwei pat ki synjam ne ki lad, ki lynti ban pynurlong ïa ka jingdawa bad jingkhmih lynti ki paidbah, shuh shuh u la ong ruh ba kane ka jingtih dewïong kaba ki ju trei kaba naduh hynriewphew snem mynshwa ka long kaba biang ha kaba ka sorkar ka donkam ban shu pynkylla tang katto katne eh kaba na ka bynta kaei kaei kaba donkam.
“Kumta ngi kyrpad ïa ka sorkar ba kan pyllait noh ïa u dewïong kaba da ka lynti, u la pynpaw ruh bun ki jingshah ktah bad kynduh jingeh ki paidbah, ki longïing long sem na ka daw ka jingbym iohlad shuh ban tih bad shalan ïa u dewiong, namar kane ka kam dewïong ha East Jaiñtia Hills District naduh ki por ba mynshwa eh ka dei ka kam kaba ki briew ki im ja kpoh bad im kamai bad kumta ka jingshah khang ban tih dewïong ka ktah haduh katta katta ïa ki paidbah,” ki la ong.
U President jong ka Jaiñtia Coal Minners and Dealers Association (JCMDA), u Bah Borin Shadap u la ong ba kane ka sienjam ka dei tang ka jingsdang bad lada ka sorkar kam sngap ïa kane ka sur u paidbah ha kaba ïadei bad ka trei ka ktah ka Association kan sa shim da kiwei pat ki sienjam bad ruh lada dawa ka kam hap ban tur wat shaduh Secreteriat ruh.
U Legal Adviser jong ka Jaiñtia Coal Minners and Dealers Association (JCMDA), u muktiar Kerlang Ksoo, u la ong, “Na ka por sha ka por ka Association ka donkam ïa ka jingïatreilang bad ki paidbah, namar haba peit mynta ka jingkhang dewïong ka la ktah shibun ïa ki paidbah naduh ka ïohkam ïohjam, ka pule puthi, ka die ka thied, ka la ktah ïa ka ïoh ka kot, kumta ka khubor kaba ngi phah sha ka sorkar ka long ba baroh shikatto bunsien ka sorkar ka khot ïa ki seng dewïong ba ïakren hynrei ka shu sah tang ha ka jingïakren bad kaei kaba ngi donkam ha kane ka por ka dei kata ka jingïakren kaba seisoh bad ka tnat Mining and Geology jong ka sorkar jylla, namar ngi sngewthuh ba kine ki SOP, ki Policy bapher bapher ba la pynmih bad ha kane ka kynti ngi la pyrshang wat ïa kane ka jingtih dewïong Scientific mining kaba 100 hectar ka jaka hynrei ha ki por ki ban wan yn sa nang pynrit ïa ki jaka tih dewïong na ka 100 hectar khnang ba kan iahap bad ki nongshong shnong kiba na kane ka thaiñ, hooid katba ym pat mih ka kynrum kynram ka sorkar ka ïaid beit hynrei ynda la mih ki kynrum kynram ka jingkynnoh ka leit sha ki paidbah, shah kem u paidbah sha lum sha wah, shah kem ki kali, wan ka jingkyrduh ha ka thaiñ bad kaba sngewsih eh ban ong ba haba long kumne nga ïohi ba wat na ka liang ki nongmihkhmat bad ki heh ba don ha Secreteriat kim don ka jingkitkhlieh eiei ïa kane ka kam ban ïalam lynti ïa ki paidbah ba kumno ban ïaid lynti nangne shakhmat”.
Haba kren bad pynsngew ïa ka rai ka Ïingbishar ba donburom ka Supreme Court kaba la mih myn ha ka u bnai Naitung jong u snem 2019, u Bah Ksoo u la ong ba ha ka jingshisha la plie ïa ka lad ka lynti ïa ka sorkar ban pynwandur ïa kane ka jingeh ki paidbah ha kaba ka ïingbishar ka la ong ba ïa ka kyndew ka shyiap kaba don shapoh bad kaba don shalor ruh kan dei ka hok longtrai ki briew, kane ka lah ban long ba ka sorkar ka la shim ïa ka bynta ba katto katne ban pyntreikam na ka bynta ka jingmyntoi jong ka hi, utei u muktiar Ksoo, u la ong shuh shuh ba kane ka kam Policy Making jong ka sorkar ka mih pynban ka kynrum kynram kiba ki paidbah kim sngewthuh sngewthaw shuh kiba la i kumba wat lada la pyllait ka Supreme Court myn ha ka 2019, kumjuh ruh lyngba ka ïingbishar High Court ki don ki ejahar ne ki case kiba ïadei bad kane ka kam trei dewïong ha kaba ka High Court na ka por sha ka por ka la bthah ïa ka sorkar ban leh noh ïa kaba donkam, ban shna noh ïa ka policy kaba biang hynrei haduh haduh mynta na ka liang ka sorkar lyngba ka jingbtah ka ïingbishar kam pat ai satia kano kano ka policy ban treikam ha ka kam dewïong, wat ha ka jingialang ba la pynlong ha u snem 2021 ba la pynlong ha Shillong la khot ïa ki nong aplai mining lease, la khotlang ruh ïa ki riew paidbah bad ki heh kiba na ki tnat sorkar ban pynsngew ïa ka Central Mining Design (CPMDI) kaba dei ka agency ka ban shna ïa ka mining policy la ong ba ha ka jingshisha kiba katkum ka aiñ donkam 10 square kilo mitar ban shna ïa ka mining policy da kaba bishar bniah ïa ka jinglong jingman ha Meghalaya, hynrei ym lah ban leh ïa kane, na kata ka daw ka sorkarka la pyrshang noh da ka 1 kilo mitar square hynrei kane ruh ka long kaba eh ban pyntreikam hapoh ka jylla, ha kane ka kynti la pyrshang noh da kane ka 100 hectar ka jaka hynrei ha ki por ki ban wan yn sa nang pynrit shuh shuh khnang ban kan dup iahap bad ka jingbit jingbiang ki nongshong shnong ka thaiñ.
Kumjuh ruh na ka liang ki longkmie kiba na East Jaiñtia Hills District, kiba ju im ja bad pyndap ïa ka ïing ka sem da ka kam dewïong, ha kaba ki ju thep maw bad jied maw dewïong, ki la pynpaw ka jingsngew diaw namar ka jingshah ktah ka ïoh ka kot naduh ba khanglad ban tih bad shalan dewïong, ki la ong ba ka ktah ïa ka pule puthi ki khun, ktah ïa ka jingïadei hapoh ki longïing longsem bad bunsiem ka pysakma ïa ki khun ruh ha kaba ki khun ki hap ban mih na ïing bad leit wad jingtrei shabar, wat shabar ka jylla ruh, ki longkmie ki la ban jur ïa ka sorkar ba kan sngewbha ban pyrkhat lem ban plie noh ïa ka jingtrei dewïong khnang ban wanrah biang ïa ka jinglong jingman kaba bit ba biang kumba ki ju long mynshwa ha kito ki por ba dang plie ïa u dewïong.
Kiba la ai jingkren ha ka jingïalang ki kynthup u ruh u Secretary jong ka Synjuk Waheh Shnong East Jaiñtia Hills District, u Bah Leningstar Rymbai, u Bah Never Lamurong uba mihkhmat na ka Elaka Sutnga, u Bah Rimon Rymbai, uba mihkhmat na ka Elaka Rymbai, u President jong ka Jaiñtia National Council, u Bah Sambormi Lyngdoh, u MDC na Bataw, u Bah Joinriwell Pyrtuh, u President barim jong ka JCMDA, u bah Balius Swer bad kiwei kiwei, ïa ka jingïalang la pynïaid da u Vice Prisident JCMDA u Bah Justine Dkhar.
Ha kane ka jingïalang ha Dkhiah la ïa don ryngkat lang ruh u MP barim u Bah Vincent Pala, ki MDC kiba na East Jaiñtia Hills District ba kynthup u Bah Lasky Rymbai, u Bah Krison Langstang bad kiwei kiwei.