Shillong, Jylliew 27 : Ka Meghalaya ka theh da ki hajar klur tyngka shabar jylla ha ka shisnem shisnem na ka bynta ban thied dud kumjuh ruh ïa ka doh kiba dei ki jait marbam ba jan baroh ki nongshong shnong ka jylla ki sngewtynnad ban dih bad bam.
“Ym dei tang ka dud ba ka Jylla ka hap ban thied na shabar hynrei wat kiwei kiwei ki jait doh kynthup naduh ka doh sniang, doh blang, doh syiar ne dohkha la shu wanrah beit na shabar jylla,” ong u Myntri Rangbah ka jylla haba kren ha ka jingïalang plie paidbah ïa ka jaka pynlang dud ha Umlyngka.
Haba ïadei tang bad ka dud, u Myntri Rangbah u la ong ruh ba jan mar shiteng lane tam ïa kata, la hap ban thied lut na shabar. “Baroh kine, la ka long naduh ka dud haduh ki jait dud bapher bapher la wanrah na shabar kaba mut da ki hajar klut tyngka la shu theh sha bar jylla ban thied ïa ki marbam mardih ban bam man ka sngi. Kumta, balei ngim shim kane ka kabu ksiar ba kane ka pisa kan poi beit shaphi hi,” u la ong.
Katkum ka jingïathuh jong u Myntri Rangbah, ka Meghalaya ka donkam dud kumba 2.5 lak ton ka dud ha ka shisnem hynrei haduh mynta kaba ki lah ban pynmih hi na ka jylla ka long tang mar shiteng. “Kane kamut 50 haduh 60 persen na ka jingdonkam dud la hap ban wanrah lut na shabar. Kaba mut lada shu khein kyllum 30 haduh 50 tyngka shi litar ka pisa kan poi beit 700 klur haduh 800 klur tyngka ka bai dud man u snem,” u la bynrap shuh shuh.
U ong ruh ba ka jingdon jong kum ka Umlyngka Primary Milk Producer Cooperative Society, ym tang ba ki ïarap ban pynbiang dud ha ka jylla hynrei ka long ruh kum kawei na ki lad kamai ha ki ïing ki sem jong ki.
Katkum ka jingong jong u, dei lyngba katei ka jingïohi jngai ba ka sorkar mynta ka la pyntreikam bun ki mission bapher bapher la ka long naduh ka Piggery Mission, Poultry Mission bad kiwei kiwei ban kyrshan ïa ki paidbah ban ieng ha la ki jong ki kjat.
