Da ki hajar ki nongshong shnong ha khappud ki tuid leit thep vote sha Assam ha ka sngi Palei

Nongstoiñ, Ïaïong 10: Ka jingthep vote ha ka jylla Assam ha ka sngi Palei ba la dep ka la long kaba shongshit bha ha kaba kumba 85 haduh 90 % ki nongthep vote ki la ïoh ban thep ïa ka vote ba kordor jong ki. Haba phai sha baroh ki district bad ki constituency ka Kamrup district bad Goalpara ki dei ba ha syndah eh bad ka jylla Meghalaya.
Hadien ba ka jingthep vote ka la kut noh ha ka jingwad jingtip bniah jong u nongthoh khubor jong u Mawphor la lap ba ki don palat khathynriew tylli ki shnong kiba la shong la sah da ki paitbah Garo kiba don ha syndah eh bad ka West Khasi hills kata ka Huapara, Malangjoypur, Malangkhasi, Kahonimara, Kamphaduli, Dolathona, Umdiengphiang, Hasem, Borkhuli, Warigro, Mawdangkop, Barigaon, Umkhamdor, Umthli, Balachireng, Doledogna bad kiwei kiwei ki shnong kiba hap ha ka Rambrai Jyrngam constituency West Khasi hills district hynrei kaba lyngngoh ka long ba ki paidbah na kitei ki shnong ki la leit ban thep ïa ki vote jong ki sha Assam ym tang ha ka Electon MLA bad MP hynrei ha baroh ki Election kum ha ki Pancahyat Election ha ki Election ba la pynlong da ka Rabha Hasong Autonomous Council bad kiwei kiwei.
Nalor kata ha ki Election jong ka jylla Meghlaya ruh naduh ka MLA Election, MP Election bad MDC Election ruh kitei ki juh ki nongthep vote ki shimkhia bha bad kim ju pynsepei ïa ka vote jong ki. Katkum ki tyllong khubor ba thikna ba la ïoh ban lum haduh kane ka janmiet sngi Thohdieng la ong ba ka jingdon jong ki nongthep vote baroh ha kitei ki khathynriew tylli ki shnong ka don kumba arphewsan haduh laiphew hajar tam ki nongthep vote bad kiba la leit ban thep ïa ki vote jong ki, ki poi ym duna ïa ka 75 %.
Haba phai sha kitei ki paidbah jong kitei ki shnong ym lah ban len ba baroh shi katta haduh mynta ïa ki jingmyntoi bad ka pynroi ki dang ïoh na baroh ar tylli ki jylla na Meghalaya bad na Assam ruh kumjuh.
Ha kaba ïadei bad ka jingleit thep vote jong ki paidbah Garo na kitei ki khathynriew tylli ki shnong ym lah ban len namar ba uwei na ki para doh para snam jong ki uba kyrteng u Ganseng B. Sangma uba dei na ki thaiñ Hahim u dei uwei na ki kyrtong MLA jong ka National Peoples Party (NPP) na ka Boko -Chaygaon seat.
Ka jingmih madan jong utei u samla ban ïakhun kum u MLA ha ka jylla Asssam ka pyni shai ba ki nongshong shnong jong kitei ki khathynriew tylli ki shnong ki la dei ki nongshong shnong ba pura jong ka jylla Assam bad ka dei ruh ka daw bah kaba wanrah ïa jingeh ban pynbeit ïa u pud u sam hapdeng ki ar jylla. Kumta lyngba kane ka MLA Election ha Assam ka pyni shai kdar ba na ka liang ka sorkar Meghalya bad Assam kim don mon satia ban pynbeit ïa u pud u sam.
Ha kajuh ka por ka kdew shai ruh ba ka sorkar Meghalaya ka pynkheiñ im im peit peit ïa ki kyndon jong ka Election Commission of India kaba kdew ba baroh ki nongshong shnong kim lah don artylli ki Election Photo Identity Card bad uwei u nongshong shnong tang kawei ka vote un ym lah satia ban thep vote ar jaka. Ki tyllong khubor ba la ?oh na ka thaiñ Langpih pat ki ïathuh ba ka Assam ka don ïa ka polling station kaba la tip kum ka Lower Lumpee polling station bad ha katei ka sngi palei kiba wan ban thep vote ki dei tang ki Nepali suda bad haba pyrshang ban kylli la ki Garo kiba shong ha Dronpara, Nawapara bad kiwei kiwei ki shnong kiba hap ha ka Lower Lumpee polling station ki don ne em kiba wan thep vote la ong ba ym don satia wat uwei ruh.
Ki tyllong khubor ki ïathuh ruh ba ki Garo kiba shong ha kitei ki shnong kim lah shuh ban thep vote sha Assam namar ki don satang ki Election Photo Identity Card jong ka Meghalaya.