Nongpoh, Risaw 11: Kum ka jingbteng ban tehlakam ïa ki rukom ñiah kali khlemakor, bad ban wanrah ka jingshngaiñ ha surok bah National Highway 6, ki pulit ka Ri-Bhoi ki la pyntip ba kial pynkhreh sa da ki kynhun ñiah thuk thuk (Flying Squads) ki ban peitngor ha shilynter u surok bah NH 6.
Na ka liang ki pulit ki la kyrpad ruh ïa ki paidbah ban bud ryntih ïa ki kyndon aiñ haba ñiah kali ban kiar na ka dih buaid, weng noh mardor ki kali ba tah iit iong, kiba pyndait ïa ki light rong blue bad saw ryngkat ki siren khlem jingbit, lait noh kito ki kali kiba la ioh jingbit bad u VIP u dei ban don hapoh ka kali.
Ki Pulit ki la kyrpad ruh ïa ki paidbah ban weng lut baroh ki light pynthaba kiba pynthud ïa ki paidbah kiba wan mar pyrshah, bad dei ban ïaid beit na ka liang ka diang jong u surok lait noh tang haka por ba knieh ïaid shakhmat ïa kawei pat ka kali.
