Khliehriat, Naitung 30: Halor ka jingthmu ban pynkhlaiñ ïa ka Information and Communication Technology Infrastructure ha ka pule puthi ha East Jaiñtia Hills District u myntri ka sorkar jylla uba dei ruh u MLA jong ka Khliehriat, u bah Kyrmen Shylla bad ka MLA jong ka Sutnga Saipung Constituency, ka kong Santa Mary Shylla mynta ka sngi ki la sam ïa ki ki Desktop Computer sha kiba bun tylli ki skul kiba don hapoh East Jaiñtia Hills District ha ka prokram ba la pynlong ha Conference Hall ha ophis u Deputy Commissioner ha khliehriat, ïa kine ki computer la ioh lyngba ka skim jong ka District Mineral Foundation (DMF).
Haba kren ha ka prokram sam computer, u bah Shri Kyrmen Shylla u la pynpaw ka jingsngew kmen halor ka jingioh ïa ki lad ki lynti kiba pher bapher na k ki skim jong ka DMF kiba long ka jingmyntoi ïa ki paidbah bad kumjuh ruh ïa ki skul, la ong ruh ba ka jingsam ïa ki kor computer sha ki skul la peit katkum ka jinglah jong ki skul bad jingdonkam ki khynnah ha ki skul, u la kren ruh halor ka jingdonkam ki kor computer ha ka pule puthi ha kine ki sngi khamtam ha ki skul ha kaba kane kan iarap ruh ïa ki khynnah ha ki jingpule ba da ki kor computer bad ka Degital Learning.
U bah Kyrmen Shylla, u la kren ruh halor kiba bun ki jingeh ba ki khynnah skul ki ïakynduh bad bynrap ruh halor shibun ki kam ba la leh da ka DMF kum kaba shna ïa ki surok, ba kyntiew ïa ka pule puthi, kyntiew ïa ka kam ialehkai sport bad kiwei kiwei ki jingnohsyniang.
Ka MLA jong ka Sutnga-Saipung MLA, ka kong Santa Mary Shylla ka la kyntu ïa ki nongpyniaid skul kiba ioh ïa kine ki Desktop Computer ba kin pyndonkam hok ïa ki ha kaba sam ïa ka jingnang jingstad sha ki khynnah skul.
Na ka liang u Deputy Commissioner ka East Jaiñtia Hills District, u Shivansh Awasthi, IAS u la ong ba na ka liang ki bor district ruh ka la sam ïa ki computer sha ki skul halor ka jingthmu ban kyntiew ïa ka jingnang jingstad bad ïa ki sap ki phong jong ki khynnah kaba lyngba ki kor computer bad ruh ba ki khynnah kin long ba la pynkhreh na ka bynta ka iohkam iohjam.
U Sub-Divisional Officer (SDO)-Sadar, East Jaiñtia Hills District, u Manish Kumar, IAS, u la ong ba ka long kaba donkam ban wanrah lang ïa ka jingtip ïa ka computer bad ka internet ha ki skul ba kan long ka jingmyntoi ïa ki khynnah ha ka pule puthi.
