Shillong, Nohprah 21 : Ka shnong Lummawbah, Upper Shillong shen kan sa ïoh ïa ki CCTV na ka scheme ba la ai da u Myntri Rangbah ka Jylla u Conrad K Sangma lyngba ka projek ‘My City’ Beautification Drive kaba kham ïar bad ka Shillong Smart City project.
Na bynta kane, ha ka step sngi Saitjaiñ, u Rangbah Shnong bad ki dkhot nongkitkam shnong ki la ïa leit ban sorjamin ïa ki jaka ba kham pdeng ban buh ïa ki CCTV camera ryngkat bad ki technician.
Kane ka long shibynta jong ka jingthmu ban kyntiew ïa ka jingshngaiñ, bad ka jingpynïaid sor ha kylleng ka Shillong bad khatduh ha kiwei pat ki jaka sor.
Katkum ka jingïathuh da u Secretary Shnong, Bah Arju Dkhar la ong ba ka thong ba kongsan ka long ban tehlakam ïa ki kam runar, khamtam ïa kiba leh kam bymman pyrshah ïa ki kynthei bad ki khynnah, ban pynbha ïa ka jingshngaiñ jong ki paidbah, ban pynsuk ïa ka jingpynïaid kali kaba kham bha, bad ban ïarap ïa ki pulit ha ki jingtohkit.
Lah ban kdew ba ha kiba bun ki bynta jong ka sorbah Shillong kane ka scheme ka la treikam ha kaba haduh kumba 48 tylli ki shnong ki la ïoh haduh kumba 250 ne 300 tylli ki camera kiba kynthup ïa ki camera kiba lah ban ïohi ïa ki nombor kali.
