Da ki bun bnai ym lah satia ka Sale Tax ban ai licence ïa kiba applai ki dukan thoh tim

Shilllong, Jylliew 20: Ka Hynñiewtrep National Youth Front (HNYF) East Khasi Hills mynta ka hapoh ka jingïalam u General u Bah Donlang Nongbri ki la hiar ban leit khynra Licence ïa ki dukan thoh tim sa sha ki thaiñ Laban, kaba dei ka jingjurip ha ka sien kaba saw ïa ki dukan thoh tim ha nongbah Shillong.
Ha kane ka jingjurip ka seng ka la lap jan baroh na ki dukan ba shong da ki bym dei ki Khasi kim don satia ïa ki licence bad ka seng ka ong ba ka lap ym don satia kawei ruh kaba don ki licence kiba pura hynrei tang ka challan kaba ki siew ban ïoh licence na ka Sale Tax Department.
Haba ïakren bad ki nongthoh khibor, u Bah Donlang Nongbri u la ong ba kane ka jingbym pynbiang ïa ki licence da ki dukan bad ka jingbym shimkhia ka sorkar ban pynbor ba ki dei ban pynbiang ka pynlong ïa ka jingduh ei da ki bun klur ka khajana ha ka shisnem kaba pynlong pat ïa ka jinghiran ka pla tyngka jong ka sorkar.
Shuh shuh u la ong ka seng ki la dawa na ka sorkar lyngba ka tnad Taxation Department ba ki dei ban wan khynra ïa kine ki dukan bad ba kam dei ban ailad ba kin plie khlem pat da ïoh ki license na ka sorkar. Shuh shu u la buh jingkylli ruh ïa ka jingbym lah satia ka sorkar ban ai ïa ka licence wat hadien ba kine ki dukan ki la siew ïa ka bai licence da ki bun bun bnai.
Shuh shuh ha ka jingkhynra ka HNYF ki dukan tim ki ïathuh ba ki don ki briew jong ka sale tax kiba ju wan lum pisa man u bnai 2,000 da ka jingkular ban pynïoh lisence ïa ki. Ha kane ka jingkhynra ka HNYF ka lap ruh ba kiba bun ki dukan thoh tim kiba ïoh ïa ka kot thoh number na ka sorkar katba ha kine ka kot ym shem la don saia kino kino ki licence number kiba dei ban thoh ha ka por ba ai ïa kine ki kot sha ki dukan thoh tim..
U Bah Donlang u la pynrem jur ruh ïa ka tnad Sale tax namar ka jingbym shimkhia ban khynra ïa kine ki dukan wat hadien ba ka seng ka la dep ban ai jingtip halor ka jingbym don licence kiba bun ki dukan thoh tim.