Da ki BSF phah ka sorkar pdeng ban pahara ha khappud Megha-Assam

Shillong, Naiwieng 29 : Namar ka jingjia ha Mukroh bad ka jingkyan hapdeng ka Meghalaya bad Assam, ka sorkar pdeng ka la phah pahara ha ki khappud jong kine ki artylli ki jylal da ki BSF.
Na kitei ar pyrton ki don ha u pud ka Meghalaya bad ar pyrton ha u pud ka Assam. ïa kane la ïathuh da u Special DGP ka Assamu GP Singh hadien ba u la leit jurip ïa ka shnong Mukroh mynta ka sngi.
U Spcial DGP u la ong ba ka jingthrang ka long ban wanrah ka jingshngaiñ ïa ki paid khappud bad ban don biang ka jingïadei bad ïa shaniah mar kylliang. U la ong ba ka jingïakren ïa pynbeit pud ruh kan ïai bteng bad ka Meghalaya namar u Myntri Rangbah ka Assam u Himanta Biswa Sarma u kwah ban pyndep kloi noh ïa kane ka kam ba sahteng.
U la ong shuh shuh ba kane ka jingjia ha Mukroh kam don ka jingïadei bad ka kam ïa kajia pud bad na kata ka daw la bthah ïa ki bor pulit bad ïa ki briew ka tnad kam khlaw ruh ba kin tohkit ban phah ïa ki kaiphod ban lap ïa ki jinshisha baroh.
Ha kajuh ka por u Myntri Rangbah ka jylla u Conrad K Sangma mynta ka sngi u la ong ba ka sorkar ka peitngor bha ïa ka jinglong jingman ka suk ka saiñ haka jylla bad ka la bthah ruh ïa ki bor pulit jongka ba kin pynkhlaiñ bha ïa ki jingpahara bad briew jongka ban syntiat khnang ba ki riew shim kabu kin ym ïoh lad ban leh kino kino ki kam kiba pynthut ïa ka suk ka saiñ.
U Myntri Rangbah u la ong “ Ka jingshongsuk ka la wanphai biang tangba kane kam mut pat ba ngin shu shong thiah thai noh, ngi la bthah ïa ki briew jong ngi ba ki dei ban long kiba peitngor bad pynkhlaiñ ïa ka jingpahara”.
Ha kaba kyntu ïa ki paid nongshong shnong ban ïa im suk imsaiñ, u Myntri Rangbah ula ong “ Nga kyntu ïa ki paid nongshong shnong ki nongïalam seng bhalang, ki riew paw khmat bad ïa baroh ba kane ka dei ka khep kaba kongsan tam ïa ka jylla ban pynïaid shakhmat ïa ka jingkren ïa pynbeit pud, kumta ka jingïaum snam bad jingïashoh ïadat kin ym wanrah ïa u soh uba thiang lane ngin ym poi shaei shaei ruh da ki jingia umsnam namar kiba shah ktah jur ki dei ki briew jongngi hi. Kumta ha kum kane ka por ka dei ban don ka mynsiem ïatrei lang khnang ba ki kam ki jam kin ïaid beit”.
Haba la kylli hato ka dei kumba kynnoh da kiba bun ki seng saiñpyrthei, ki seng bhalang ba ka sorkar MDA ka tlot bor palat ban tehlakam ïaka shongsuk shongsaiñ, u Myntri Rangbah ula ong “ Ka suk ban kren ban ong bad kam eh hi ruh ban shu hukum ïa ki pulit ban siat naphang ne ban pyndonkam beit da ki bor pahara ban thom bor. Hynrei nga kwah ban ïathuh shai kdar ïa phi ka long kaba suk ban kren hynrei kaba eh ban sngewthuh, ban ïai shah ban sngap ban ïa pynbeit lada jia ba leh pat da ka bor kumta kaba bha hi ka long ban leh ïakiei kiei da ka jingjai jai”.
U la ong shuh shuh “ Ki briew ki lah ban shim da kumno kumno ruh ngam don kano kano ka jingsngew, namar ha nga hi nga kaba kongsan ka long ban don ka jingshongsuk shongsaiñ, jingshngaiñ ïa baroh ki paid nongshong shnong bad khamtam eh ban kiew ka roi ka par ha ka jylla. Ai kin ong bad kren katba kren, kam lei lei, ngi lah da kaba suk eh ban pyndonkam da ki bor pulit bad ka jinglong jingman ka lah ban nang kham sniew shuh shuh, hynrei kaba bha tam ka long ban ïai shah, sngap bad ïakren ban pynbeit ïaki jingeh hooid ki jia ki khep ba ïa kynduh mawsiang hynrei ka dang kham lah da kane ka lynti ba jai jai”.