Da ki Bom pynkhyllem ki bor synshar District ïa 11 tylli ki Karkhana Coke beaiñ ha EJHD

Khliehriat, Nohprah 14 : U Deputy Commissioner ka East Jaiñtia Hills District, u Shivansh Awasthi, IAS u la iathuh ba katkum ba la bthah da ka ïingbishar Meghalaya High Court ka kynhun kaba hapoh ka jingpeit jong u SDO Sadar ka East Jaiñtia Hills District, u Manish Kumar, IAS ka la leit ban pynduh pyndam noh ïa ki karkhana coke kiba don hapoh ka district kiba la pyrshang bad pynieng bad pyntrei beaiñ, ha kane ka jingleit jong ka kynhun la ïa don lang ruh u Environmental Engineer na ka tnat Meghalaya State Pollution Control Board, u bah Y.F.Laloo, ki heh sorkar napoh ka district lem bad ka kynhun na ka tnat pulit.
Ka jingpynduh pyndam ïa ki karkhana coke ka long da kaba shu pynbthei.
U Deputy Commissioner u la ong shuh shuh ba ki la don haduh 16 tylli ki coke plant ha East Jaiñtia Hills District kiba la pynieng beaiñ khlem pat lah ban pynbiang ïa ki kyndon kumba la bthah da ka sorkar, san tylli na kine ki karkhana beaiñ la dep ban pynpra naduh ki por ba la leit bad ïa kine ki khat-wei tylli kiba dang sah pat la dep phah shithi ne notice sha ki trai naduh u bnai risaw 2025 bad la bthah ruh ïa ki trai ba kin wan pynpoi ïa ki kaiphot la ki la dep ioh jingbit ne em ban pyntrei hynrei ym shym la ioh jubab eiei na ki trai, kumta ki bor district ki la shim ïa ka synjam kumba la bthah da ka ïingbishar jong ka Meghalaya High Court ha kaba naduh ka 13 tarik mynta u bnai nohprah ka kynhun ka la sdang ïa ka kam ban leit pynpra bad pynduh pyndam noh ïa ki khat-wei tylli ki karkhana coke.
Hynrei ka kynhun la ioh ban pynduh pyndam tang ïa ki hynñiew tylli ki karkhana coke katba ïa ki saw tylli ki karkhana coke pat la dep ban pynduh pyndam hi da ki trai hashwa ba ka kynhun kan wan, na ka liang u Shivansh Awasthi u la pyntikna ba kitei ki khat-wei tylli ki karkhana coke kiba ieng beaiñ hapoh ka district mynta ki khlem treikam shuh bad la pynduh pyndam ïa ki.
Ki hynñiew tylli ki karkhana coke ba la pynduh pyndam da ka kynhun ba lam khmat u SDO Sadar, ki kynthup ka M/s S.M Coke Kseh Wah ba don ha Laharang Nongjri, ka M/s Iawankaa Minerals Pvt Ltd, Nongjri ba hapoh elaka Sutnga, ka M/s D.K. Coke, Liar Moyngkai ba don ha Lelad, ka M/s JMK Coke Industries Pvt Ltd , ba don ha Sutnga, ka M/s Vivan Associate ba don ha Sookilo, ka M/s Safari Coke, Madan Kyor Pailang ba don ha Sookilo bad ka M/sc Sutnga Fuels, Sookilo.
Kiwei pat ki saw tylli kiba la pynpra hi da ki trai ki dei kiba la tip kum ka M/s Meghalaya Minerals ba don ha Umtyra, ka M/s East Jaiñtia Coke, Iaka Lum Um-Taskung bad don ha Tluh, kawei pat ka M/s SK Coke Industries, Tnad Wah Shken ba don ha Sutnga bad ka M/s HMP Coke Industries Synrang Wah Saphai, Sunga.