Nongpoh, Nailar 02: Hadien kiba bun ki jingud jingnam jong ki paidbah halor ka jingjynjar ban kynduh ïa u SDO bad ki nongtrei bad ban pyndep ki kam ki jam ha Patharkhmah Civil Sub Division, ka seng Ri-Bhoi People’s Council (RBPC) Sengkmie hapoh ka jingïalam u Samla Jayson Lennox Nongrum President lem bad ki dkhot mynta ka sngi kala leit ban jurip syndon ïa katei ka ophis sorkar ban lap ïaka jingshisha kumba la ud da ki paidbah.
Ha katei ka jingleit jurip naka liang ka seng kala poi ha ophis jong u SDO haka por 12 baje eiei mynsngi bad ka seng kala lap ba ïa katei ka ophis la shu khang tala naduh ka khyrdop ba nabar haduh ki kamra treikam ba shapoh nalor ka jingsma bad ka jingjaw um ki kamra hadien ba ka seng kala phah plie ha u nongap katei ka ophis u SDO.
Kum ban shu pynpaw ba ïaka Patharkhmah Administrative Unit la kyntiew kyrdan noh sha ka Civil Sub Division hadien kumba 33 snem bala wan ruh ban plie paidbah ïaka da u Conrad Sangma Myntri Rangbah ka jylla ha u snem 2022 da ka jingangnud ban ai ka jingshakri bad ban pynjan ïaki tnad baad jingtreikam jong ka sorkar sha ki paidbah, bad naduh bala plie ïa katei ka Civil Sub Division la buh ruh ïaka ophis ba shipor jong u Sub-Divisional Officer ha ka ophis jong ka tnad PHE namar ba ym pat lah ban sdang shna ïaka ophis treikam ba pura wat hadien ba naka liang ka shnong Patharkhmah kala dep ban ai jaka naduh u snem 1998.
Haba kren sha ki lad pathai khubor naka liang u Samla Jayson Lennox Nongrum kum u nongïalam ka seng u la pynpaw ba ka jingkyntiew kyrdan ïaka Patharkhmah Adminis-trative Unit sha ka Civil Sub Division kala long ka jingkmen bad ka jingkyrkhu ïaki paidbah nongshong shnong ban pynsuk bad pynjan ruh ka jingshakri bad ki tnad sorkar sha ki paidbah namar ki paidbah ki hap ban leit shaduh Nongpoh naka bynta ka jingdonkam jong ki nalor ka lynti kaba jngai, hynrei kaba sngew lyngngoh mynta ka long ba katei ka ophis jong u SDO kam shym la pynhun ïaki paidbah ha kaba ïadei bad ka jing ai jingshakri namar da ki taiew bad ki bnai katei ka ophis kam don nongtrei bad bun bala shu khang tala.
U la ong ruh ba u Myntri Rangbah ka jylla u Conrad Sangma u la kren shai haka sngi ba plie ïa katei ka ophis treikam ba ïa katei ka Civil Sub Division la ai sha ki paidbah ban pynsuk ïaki bad ban pynjan ïaki tnad sorkar hynrei ka Patharkhmah Civil Sub Division kala shu long tang ka shynrong bad kam ai jinghun ïaki paidbah haka rukom treikam bad ka rukom ai jingshakri bad haduh mynta kam pat don dak eiei ba ka sorkar kan sdang noh ban tei ïaka ophis treikam ba pura wat hadien ba ka jaka la dep ban ai sha ka sorkar.
“Lada ka long ha kane ka rukom kan bha ïaka seng ban khang tala syndon ïa katei ka ophis u SDO bad ba ka PHE kan shim biang ban pynlong kum ka ophis treikam jong ka, namar kam don jingmut ba kat ka ophis jong ka Civil Sub Division yn shu khang tala beit man ka por bad wan trei tang haka sngi ba ki mon ban shu wan shong tang shiphang ar phang bad leit phai biang” la ong u samla Jayson.
Namarkata naka liang ka seng kala kyrpad sha ka sorkar ba ka dei ban thung noh da u SDO ba pura ha Patharkhmah Civil Sub Division u ba lah ban shong ha katei ka ophis bad ban shakri ïaka jingdonkam ki paidbah ryngkat ki nongtrei kiba thikna ban pynsuk ïaki paidbah kiba leit donkam ha katei ka ophis, u la bynrap.
