Nongpoh, Nailar 28: Namar ka jingbym phaikhmat jong ka sorkar ha kaba ïadei bad ki jingdonkam jong ki skul sorkar haki shnong bapher bapher, ka RBYF Umsning Circle hapoh ka jingïalam u Samla Balakmen Nongbri kum u president ryngkat ki dkhot kila leit ban aiti da ki ben bad desk ryngkat ki jaka bret ñiut sha ka Government LP School Umsaitsning, kaba dei ka skul sorkar kaba don hapdeng ki jingduna ba bun bad ka jingeh ïa ki nonghikai bad khynnah skul.
Ka seng kala leit ruh ban aiti da ki ben bad desk dei hadien ba ki ïoh jingtip bad ïohi ïaka jingdonkam shisha jong ki khynnah skul ïaki ben bad desk nalor kiwei kiwei ki jingduna kum ka building bala donkam ban pynheh namar ka jingkhapngiah.
Kum ka seng da ka mynsiem kaba sngewkhia watla ka dei ka skul sorkar kam banse ban leit aiti da ki ben bad desk namar ka jingdonkam kyrkieh jong ki khynnah pule ha katei ka skul.
Naka liang ka seng kala buh ruh ka jingkyrpad sha ka sorkar ba ka dei ban phaikhmat sha ki skul sorkar kiba don sha ki shnong bapher bapher namar teng teng kidei ki skul ki shu don tang ka shynrong khlem ki jingdonkam kiba biang ba ki khynnah ki lah ban ïoh, hynrei la shu ieh lyngkrang kaba la pynlong ïa bun kitei ki skul naduh ki khynnah bad ki nonghikai ban mad jingeh.
