Nongpoh, Lber 25: Ka Khasi Student Union (KSU) Nongpoh Circle ryngkat ka KSU Saiden Unit ha ka sngi Baar ki la ai sngewbha da ki Ben bad ki Desk sha ka skul Saiden Secondary School, kaba don hapoh ka Shnong Saiden.
Haba leit ban aiti ïa ki ben bad ki miej la ïalam da u President ka KSU Nongpoh Circle, u Samla John Lyngdoh bad u Secretary, u Samla Banshanlang Kharshanlor lem bad ki dkhot, kiba la leit ban kynduh ïa ki bor pynïaid ka skul ban aiti ïa kitei ki ben bad ki desk sha u Headmaster u Bah James Nongsiej kaba long ka jingai sngewbha na ka bynta ka jingdonkam ki khynnah skul.
Kum ban kdew, ka Saiden Secondary School la seng ha u snem 1998 da ka jingkyrshan ka Dorbar Shnong Saiden ba ki buh ïa ka thong ban kyntiew ïa ka jingnang jingstad ki samla bad wat haduh kine ki sngi, katei ka skul ka dang ïa kynduh shibun ki jingduna kiba long katkum ka jingdonkam ki khynnah ha katei ka skul.
Haba kren ha kane ka sngi, u President ka KSU Nongpoh Circle, u Samla John Lyngdoh bad u Secretary u Samla Banshanlang Kharshanlor, ki la ong ka daw kaba la pynlong ïa ka seng ban shim ïa kane ka sienjam ban ai sngewbha da ki Ben bad ki miej ka dei ka jingangnud ka seng ban dang kyntiew ïa ka jingnang jingstad bad kumba long mynta katei ka skul ka dang donkam shibun ki jingïarap na ka bynta ban dang pynjanai ïa ka jingtreikam ban kyntiew ïa ka pule ka puthi.
Ki la ong ruh kum ki nongïalam seng ki shim ruh ïa kane ka bynta ka dei halor ka thong jong ka seng ban phai khmat kyrpang sha ki samla pule, namar kum ki samla kiba pule ki donkam shibun ki jingdonkam kiba lah ban ïarap ïa ki ba kin dang pynjanai ha ka jingpule bad ka thong kaba hakhmat hi ka seng ka kwah ban mih kita ki khun samla kiba la ïa ryngkat dor bad kiwei ki jylla ha ka liang ka jingnang ka jingstad, ki la bynrap.
