Nongpoh, Nailar 09: Ki lai tylli ki sengbhalang ha Jirang ba kynthup ïa ka HNYF, UHM bad ka HITO hynnin ka janmiet ki la beh krad ïa ki bar jylla ba wan bylla pom siej ha Jirang, kaba dei halor ka nongrim ba la shu wanrah be-aiñ da uwei u rangbah Khasi khlem da pynbiang ïa ki kot ki sla.
Kine ki bar jylla ki don kumba 23 ngut ba la shu wan rah tuh da uwei u Rangbah ki la shah pynphai kylla sha Assam, ka dei hadien ba la la lap da ki nongïalam jong kitei ki 3 tylli ki seng bad halor ka nongrim ba kim shym la don ki kot ki sla bad ki la shu wan bylla beaiñ na ka liang kitei ki lai seng ki la beh kylla sha Assam bad khlem da ailad ba kin ioh ban bylla pom sieh ha katei ka Shnong Jirang.
Ki nongïalam kitei ki 3 seng ba kynthup ïa Airmen Wahlang, vice president ka HNYF, U Mormesor Rani President ka UHM, bad u Bah Wos Thangkhiew jong ka HITO ki la pynpaw ïaka jing pyrshah kaba jur halor ka jingleh jong u tei u rangbah Khasi ban wan rah ïa kitei ki bar jylla khlem da pynbiang ïa ki kot ki sla bad ruh khlem da pyrkhat ïa ka jingma haba ki briew kiba nabar ki wan ban bylla khlem da pynbiang ïa ki kot ki sla kaba dei tang na ka bynta ka jingmyntoi shimet jong u, ki la ong.
Na ka liang kitei ki nongïalam ki 3 seng ki la buh ruh ka jingmaham kaba jur ïa kiwei ki trai jaka ba kim bit ban wan rah ïa ki nongbylla ba na shabar khlem da don ki kot ki sla kiba biang bad na ka liang kitei ki nongïalam ki la ong ruh ba kin dang ïai buddien bad lada ki lap ba dang don kiwei kiba wan rah bar jylla tang ban myntoi shimet khlem da pynbiang ïa ki kot ki sla kum ka seng kin nym ailad bad kin shim da ki lad kiba tyngeh, ki la bynrap.
