Da ki 5 Star resort yn tei ha EKH bad WGH nalor ki jaka sah pyngad ha Sohra bad Umïam
Ban hun jrut ki nongwan kai sha Meghalaya
Shillong, Naitung 09 : Da ka thong ban pynlong ïa ka Meghalaya kum kawei naki jaka jngohkai pyrthei kaba ki nongwan kin da hun hi jrut, ka sorkar jylla ka la pynkhreh mynta ban tei shuh shuh kham bun ki jaka sah kiba paka ne kita ki ‘five star luxury resort’ ha East Khasi Hills kumjuh ha West Garo Hills nalor ki jaka sah kai pyngad ne kita ki Glamping site ha Sohra bad Umïam.
Haba pynbna ïa kane ha kane ka sngi Balang, u Myntri ka tnat Tourism ka sorkar jylla, Bah Paul Lyngdoh u la ïathuh ba ïa kane ka rai la shim ha ka jingïalang kaba la lum da u Myntri Rangbah ka Jylla, Conrad K Sangma. U la ïathuh ruh ba ha kane ka jingïalang la ïa kren bad ïatai sani ruh halor ka jingtrei ïa ki 5 Star resort ha Sohra, Umïam bad ha Tura nalor ki jaka sah pyngad.
“Nga sngewkmen ban pyntip ïa phi ba ngi sdang pynïaid ïa ki kam bad ngi la rai ban pyntreikam ïa kane lyngba ka PPP Mode ha kiba bun na kine ki kam ba dang sdang thymmai,” u la ong da kaba bynrap ba kawei na kine, kadei ka jingshna ïa ka 5 star luxury resort ha Sohra.
Nangta u la ïathuh ruh ba ka sorkar kan tei ïa ka integrated 5 star resort ha Umïam ha kaba ïa ka jingtei kan dei ha ka jaka kaba heh haduh 35 akar kynthup ïa ka dewlynnong kaba ïar 36.78 akar ha kaba ka jingkhot tender la khmih lynti ban pynlong noh shen.
U Bah Paul u la ong ruh ba ka rai jong ka sorkar ban pynbha bad pynheh shuh shuh ïa ka Polo Orchid Hotel ha Tura ka long khnang ba kan dei kawei na ki hotel kiba paka tam nalor ba kan ngiam shuh sa kumba 100 kamra na ka bynta ban khring kham bun shuh shuh ki nongwan kai.
U ong ruh ba ka sorkar ka la jied ruh ïa ki jaka ha Sohra kumjuh ha Umiam na ka bynta ban pynlong kum ki jaka sah kai pyngad kiba long ki sien pyrshang kiba thymmai ha ka jylla.
“Ngi khmih lynti ba ïa kine ki jaka sah pyngad yn sa lah ban sdang noh mynta u snem hi,” u la ong.
Ha kawei ka liang, u Bah Paul u la ïathuh ruh ba ki khmih lynti ba ka jingpynheh ïa ka Shillong Airport la khmih lynti ban pyndep noh ha shwa ban kut jong u 2026 ha kaba kin don liengsuin kamai man ka sngi na Shillong sha Tura bad Guwahati.