Shillong, Lber 23 : Ka Meghalaya ka la lah ban ïalehkai bha ha ka kylla kaba ar da kaba ïoh ban pyndep ïa ka sngi kaba ar jong ka Col CK Nayudu Trophy plate group pyrshah ïa ka Sikkim da ki 133 ron la lai wiket, kaba pynlong ïa ki ban ïoh lamkhmat ïa ka liang pyrshah da ki 119 ron.
Haba sdang ïa ka sngi da ki 48 ron la saw wiket, ka Sikkim ka la ïoh ban kamai haduh 203 ron ha shwa ba kan liem lut ki rangtied ha ki 65.2 over kaba ailad ïa ki ban lamkhmat ïa ka inning kaba nyngkong da ki 14 ïa ka Meghalaya ha ka jingïakhun ha Bhubaneshwar.
Hadien ba la ïoh ban khur lai wiket hynin ka sngi, u Abishek Kumar jong ka Meghalaya u la ïoh biang ban khur sa ar wiket kaba pynlong ïa u ban ïoh khur san wiket la 53 ron. Hynrei dei da ka jingtbit jong u Bipun Kumar Ray uba ïoh ban khur ar wiket la 42 ron bad u Sudhir Sahani ar wiket la 46 ron kiba la ïoh ban pynliem kloi ïa ki arngut ki snar kamai ron ka Sikkim ba kynthup ïa u Rahul Kumar bad u Ankur kiba la ïoh ban kamai 64 ron ha ka wiket kaba 7.
Uwei pat uba khur wiket ha kane ka sngi dei u Agreas Chamcham Sangma uba ïoh ban khur shi wiket la 37 ron.
Haba la poi ka pali jong ka Meghalaya ban tied, ka jylla kala ïoh ban neh 133 ron la lai wiket. Kaba pynduh mynsiem shipor kadei da ka jingkhyllem kloi noh u Swastic Chhetri ha ka bol kaba khatduh ha katei ka sngi da ki 44 ron. Nalorkata, u Arien Bonchang Sangma u la ïoh ban kyrshan lang ïa ka kynhun da ki 55 ron na ki 101 bol.
Utei u rangïalehkai u la ïoh ban kamai 49 ron ha ka por ba u tied lang bad u Aman Kumar uba ïoh 17 ron, nangta 72 ron bad u Chettri ha ka wiket kaba lai. Ym tang katta ka don ka jingkyrmen ruh ba un lah ban kamai ron kham bun shuh ha ka jingïalehkai kaban bteng biang la shai ka step.
