Da kaba wah ïa ki lama ïong ha kylleng ki jaka, rakhe ka KSU ïa ka sngi badum ha ka jylla

Shillong, Nohprah 11: Ki dkhot jong ka Khasi Student’s Union ha ka sngi Palei kila leit ban wah ïa ki jingthoh ne Banner ha kylleng ki jaka jong ka nongbah Shillong kum ka jingrakhe ïa ka sngi kaba dum ne Black Day ha ka thaiñ shatei Lam Mihngi (North East) baroh kawei halor ka jingmynjur bad jingpynlong Aiñ jubor ka Sorkar India ïa ka Citizenship Aamendment Act ha ka 11 tarik u Nohprah 2019.
Ha kane ka sngi la ïohi ïa ki dkhot jong ka seng ki la leit ban wah ïa ki lama ïong sha kiba bun ki jaka kiba long kongsan bad ki jaka trei jong ki tnat sorkar. Kane ka jingwah ïa ki Lama ïong ka la sdang na Motphran bad la pynbud ter ter sha kiwei pat ki jaka.
Lah ban pynkynmaw ba ka North East Student’s Organisation (NESO) ha ka sngi Balang ka la khot ban pynlong ïa ka jingrakhe ïa ka sngi badum ha ka sngi Palei ha baroh ki 7 tylli ki jylla kane ka thaiñ shatei lammihngi kaba long kum ka dak ban pyrshah ïa ka Citizenship Amendment Act (CAA), 2019.
Ka NESO ka la pynkynmaw ruh ïa ki paidbah kane ka thaiñ ba ha ka 11 tarik u Nohprah, 2019, wat hapdeng ka jingpyrshah ba khlem sangeh jong ki riewlum trai muluk pyrshah ïa ka CAA ka sorkar India kam shym la pynsangap bad khatduh lyngba ka Rajya Sabha la ai ka jingmynjur ïa ka aiñ Ïakjakor CAA, kumta ka NESO ka la pynbna ba kane ka sngi 11 tarik kan dei ka sngi sah kynmaw ban rakhe ïa ka sngi badum ha baroh kawei ka thaiñ shatei lammihngi.