Shillong, Nohprah 12: Kiba bun ki Dorbar Shnong jong ka nongbah Shillong ha ka sngi Thohdieng ki la pynlong ïa ki jingpynkhuid shnong kaba la sdang naduh ka por mynstep haduh ka shiteng sngi jong kane ka sngi.
Kane ka jingpynkhuid shnong kaba dei kaba ju leh hi manla u snem kum ka dak ka jingpynkhreh ha shwa ban rakhe ïa ka lehkmen Khrismas bad u snem ba thymmai.
Ha kane ka sngi la ïohi ïa ka jingïashim bynta ba shitrhem jong ki nongshong shnong ha la ki shnong ki thaw ha kaba ki la pynkhuid ïa la ki shnong da kaba ki sar, ki pusharai ïa ki kynroh da ka shun bad kumjuh ruh ka jingpynkhuid ïa ki kyndong kynshrot bad don ruh ki shnong kiba ai da ka rong ïa ki grill jong ki lynti ïaid paidbah kiba don ha ki shnong ki thaw jong ki.
Ka jingpynkhuid shnong mynta u snem ka la khampher bha namar jan baroh ki shnong ki hap ban pynkhuid ïa ki shnong ki thaw da ka jingtyrkhong khlem um, namar naduh ka 10 tarik mynta u bnai haduh ka sngi Thohdieng, kaba mut la 3 sngi, ka tnat Public Health Engineering kam pat shym la lah satia ban sam ïa ka umbam umdih kaba pahuh sha ki katto katne ki shnong jong ka Nongbah Shillong.
Kumba long haduh mynta ki nongshong shnong kiba mih ban pynkhuid ïa la ki shnong ki thaw ki hap ban shu pynkhuid malu mala namarba ki la pynpaw ba kim sngewkwah ban kynther palat ïa ki ñuit bad ki pum pum namar bym don um ban ïoh sum ïoh sleh ne ban sait kti sait kjat bad kumta ter ter.
Kumba ju long manla u snem la ju ïohi ruh ïa ki kali kit um ne Firebrigade ba ki ju wan ban kynshait da ka um ïa ki nala bad ki lynti syngkien hynrei mynta u snem bad ha une u bnai kiba bun ki shnong ki hap pynkhuid ïa ki shnong ki thaw da ka jingtyrkhong um, khlem ïoh ban synreit um ïa ki lynti ïaid ne ki jaka ba dei ban pynkhuid da ka um.
