Nongstoiñ, Nohprah 04: Ka District Magistrate Eastern West Khasi Hills District Mairang, ka la pynjari da ka Kyndon aiñ kaba 163 BNSS 2023, na ka bynta ban khang pyrshah ïa kino kino ki riew shimet, ne kino kino ki kynhun, kiba ju tong shyiap na ka wah Kynshi.
La mana ruh ban tih maw bad shyiap ha ka jingjngai kaba 200 metre na ka surok National Highway 44-E. Yn ym shah ïano ïano ban sait ïa u shyiap ha ka jingjngai kaba 200 mitar na ka wah Kynshi. Kumjuh la khang pyrshah ban lum thup ïa u shyiap bad maw ha shilynter ki rud jong ka surok National Highway 44-E.
Ïa kane ka ai la pynjari halor ka jingdon ki katto katne ki nongshong shnong kiba ju tong shyiap na ka wah Kynshi, kiba tih maw na ki lum kiba don ha shilynter u surok National Highway 44 E khlem da ïoh jingbit na ki bor ba dei khmih. Kumjuh, kito kiba ju sait ïa u shyiap bad pyntuid sha ka wah Kynshi ha kaba ka la wanrah ïa ka jingjaboh ïa ka wah.
Ka jinglum thup ïa u maw bad shyiap ha ki rud jong u surok National Highway 44-E, ka pynthut ïa ka ïaid ka ieng ki kali bad ki paidbah. Ka jingtuid ki umjaboh sha ki wah ka buh jingma ïa ki jingthaw ba im ha um bad kumjuh ki nongshong shnong kiba shong ba sah marjan bad ka wah Kynshi.
Kane ka jingpyntrei beaiñ khlem da ïoh jingbit na ki bor ba dei khmih ka long ka jingpynkheiñ ïa ka hukum jong ka National Green Tribunal (NGT) bad kumjuh ruh ka Meghalaya Minerals Concession Rules, 2016
Kino kino kiba ïaleh pyrshah kin ngat ha ka jingshah pynsaja katkum ka Kyndon aiñ 223 BNSS Act, 2023, ka Mines and Minerals (Development and Regulation) Act, 1957, ka Environment Protection Act 1986, ka air (Prevention and Control of Pollution) Act, 1981, ka water (Prevention and Control of Pollution) Act, 1974 bad ka Hukum NGT 2013.
Lada don pat kino kino ki bym sngew ïahap ïa kane ka rai, ki lah ban leit ïakynduh ïa ki bor ba dei peit na ka bynta kano kano ka jingpynkylla lada I donkam.
