Da kaba tyngeh khyrwit u Symbud Myntri Rangbah ïa u MLA ka Nongkrem

Shillong, Jymmang 04 : U Symbud Myntri Rangbah ka Jylla, Bah Prestone Tynsong ha ka sngi Balang u la ong ba ki nongthawaiñ kim lah satia ban long ruh ki nongpynkheiñ aiñ.
Kane ka jingkynthoh jong u kadei halor ka jingkren jong u MLA ka Nongkrem, Bah Lambor Malngiang ha ka jingïalang kaba long dang shen ha constituency jong u ha kaba u la byrngem ïa ki ophisar lada jia ba ki wan ban pynsangeh ïa ka jingtih maw tih shyiap.
Da kaba kynthoh ïa ka jingkren jong u Lambor kum ka jingkren khyllung u Bah Prestone u la ong, “Ngi dei ki nongthaw aiñ. Ki nongthawaiñ ki dei ban thaw ïa ki aiñ bad ki kyndon bad y dei tang ïa ki aiñ jong ka jylla hynrei ban pyntreikam ruh wat ïa ki aiñ jong ka sorkar pdeng. Hynrei ban kren ïa kine baroh da ka jingsngew, nga sngew ba kam long satia kaba dei.”
Nalorkata, u ong ruh ba ki nongthawaiñ bad ki nongmihkhmat paidbah ki dei ban tip kumno ban kren. “Kumba nga la ong, la ka dei ki MLA, MP ne MDC ngim lah satia ban long ki nongpynkheiñ aiñ. Ka aiñ ka don bad ka hok ka synshar kumta ngi hap ban ïaid katkum ka aiñ,” u la bynrap shuh shuh.
Shuh shuh u ong ruh ba ki nongthawaiñ ki dei ruh ban da tip biang biang ïa ki aiñ ka jylla kumjuh ki aiñ jong ka sorkar pdeng ha shwa ban kren. U ong ruh ba ym lah satia ban ïaid lait ïa ki aiñ ba mynjur da ka Parliament kumjuh ruh da ka Iing Dorbar Thawaiñ ka jylla bad ym dei ruh ban kulmar halor kane.