Da kaba shu aiwai yn pynkut ka sorkar ïa ka jingkyntur pud ki paidbah ïa jaka sorkar

Shillong, Naiwieng 26 : Ka Sorkar Jylla ha ka sngi Nyngkong ka la shim ïa ka rai ban shu aiwai noh ïa ki jaka sorkar ba hap hapoh ka General Administration Department (GAD) kaba don ha Tura, West Garo Hills khnang ban pynkut noh ïa ka jingshah kyntur pud ki jaka sorkar.
Haba kren bad ki lad pathai khubor hadien ba la wai ka jingïalang jong ka Kynhun Myntri, na ka liang u Myntri Rangbah ka Jylla Conrad K Sangma u la ïathuh ba ka sorkar ka la shim ïa kane ka rai khnang ban khanglad ïa ki paidbah ban kyntur pud ïa ki jaka jong ka sorkar kiba don ha katei ka jaka.
“Ka sorkar ka la shim da kajuh ka sienjam ban shu aiwai noh ïa ki jaka sorkar sha kito ki paibah kiba sah ha ki jaka sorkar da kajuh ka rukom kumba ka leh ha Williamnagar, East Garo Hills,” u la ong.
Nangta u ong ruh ba kane ka sienjam da kaba shu aiwai noh kham slem ïa ka jaka sha kito ki paidbah kiba sah ha ki jaka jong ka sorkar kan pynkut noh ruh ïa ka jingkynad kaba la neh da ki phew snem kynthup ïa ki mukotduma nalor kiwei ki jingeh kiba ju mih man ka por kynthup ïa ki jingïakhih bad ki jingshah kyntur pud ha ki jaka sorkar.
Shuh shuh u ong ruh ba ka jingai wai ïa kine ki jaka kin pynskhem shuh shuh ba kitei ki jaka ki dang dei ki jaka jong ka sorkar. U la ong ruh ba ka jingai wai kan long beit katkum ki kyndon.