Da kaba shaniah leit aiti ka kmie ïa u khun, shet kylla ki Pulit da kaba bom haduh ban da shitom jur

Shillong, Naitung 7 : Kum ka briew kaba burom bad ba sheptieng ïa ka Aiñ, kala ïalam ïa la u jong u khun ban aiti sha ka aiñ hadien ba shah thwet bad shah khot hajir namar ki kam ïashoh briew namar ka shaniah ïaki bor Pulit hynrei phewse ka lap ba ki Pulit ki shet kylla ïa ka namar ynda kala leit shaw hadien ka por bala buh por , la lap pynban ba ki Pulit kila shoh dusmon ïa une u Khun haduh ba ula shitom jur bha.
Kane ka jingjia kala jia ha ka 3 tarik Naitung ha Sohra Police Station. Une uba shah shoh u kyrteng u Getwin Jyrwa ba dang 19 snem ka rta, Khun jong I kong Mildred Jyrwa.
Namar ka jingbitar ïa ka jingleh tohmet jong ki Pulit ka Sohra Police Station, I Kmie Kong Mildred Jyrwa ila leit ujor da ka ejahar sha u Superintendent of Police ka East Khasi Hills Bah Vivek Syiem. Ine I Longkmie ila leit buh ruh ïa ka jingujor hakhmat ka Meghalaya Human Rights Commissin (MHRC).
Ha ka ejahar, I kong Mildred ila iathuh ba ha ka 3 tarik Naitung, haba i ïoh khubor ba ki Pulit ka Sohra Police Station kila wad ïa u khun jong i, ma I hi kum ka Kmie, ila leit ïalam ïa u khun sha Police Station ha ka por 9 baje mynstep hynrei ha ka por 2 baje janmiet haba I leit shaw ïa u, la lap pynban ba ula mynsaw jur na ka jingbom, jingpynshitom tohmet ki Pulit.
“Mar mar nga la ïalam noh ïa u sha Sohra CHC bad nangtei kila phah noh ïa u sha Shillong Civil Hospital ban ïoh ïa ka jingsumar. Mynta u dang don ha kane ka jaka sumar bad la buh ban pyllait noh ïa u ha ka 7 tarik Naitung” ïathuh I kong Mildred ha ka ejahar.
Kat kum ka jingïathuh jong I, u Getwin ula ïashoh briew ha ka 28 tarik Jylliew bad ki Pulit kila khot hajir ïa u sha Police Station ban tohkit hynrei u Getwin u khlem leit mih satia, kaba la pynlong ïa ki Pulit ban wan wad na ïing bad bthah ruh ban phah wan mih ïa u sha Thanad.
“Kum ka Kmie, nga tieng ban phah ïa u mynmiet bad kumta, nga la leit buh hi mynstep sha Thanad. Ki Pulit kila kylli pyrthew bniah ïa nga bad hadien kila phah noh ban leit sha ïing. Hynrei ynda nga leit shaw, nga la lap pynban ïa u Khun hapdeng ka jingmynsaw jur” ila iathuh.
I Kong Mildred ila kynthoh ba lada u Khun jong i, ula leh ïa ka kam kaba shyrkhei kaba dawa ïa ka jingpynshitom, ki Pulit kila dei ban ïaid kat kum ka lynti jong ka aiñ ym ban shu shoh shu bom hapoh Police Station bad sa pyllait noh hadien.
I ong ba kane ka jingleh ki Pulit ka dei ka jingpynkheiñ ïa ka hok longbriew u khun jong I haba dawa ïa u Superintendent of Police ba u dei ban ai ka jing pynshitom ïa ki Pulit kiba donkti ban shoh dusmon ïa u Khun jong i.
I Kong Mildred ila dawa ruh ba ki pulit ki dei ban siew ïa ka jinglut jingsep bad udei ban ïoh ïa ka jingbishar hok namar kane ka jingpynshitom jong ki pulit ka Sohra Police Station ïa u khun jong i, ka long ka bym lah ban pdiang haduh ba tang ba u leit shabar ruh ym lah shuh.