Mawkyrwat, Jymmang 03: Ka Selajong Football Team mynta ka sngi ka la ïoh rung sha ka phainal hadien ba ka la lah ban pynliem noh pyrshah ïa ka Lamare Football Club da 3 – 2 kol ha ka lympung ïalehkai ba la tip kum ka 1st Sngap Singh Syiem Football Tournament (SSSFT) 2022 ba la pynïaid da ka HYC Mawkyrwat Circle hapoh madan Artificial Turf (MDSA), South West Khasi Hills District, Mawkyrwat.
Haba phai ha ka jingïalehkai kaba dei ka semi final ba nyngkong mynta ka sngi hapdeng ka Lamare SC pyrshah ïa ka Selajong FT ba wat hapdeng u slap ruh ka long shisha ka jingïalehkai kaba pynshongshit ïa ki paidbah ba wan ban peitkai ha kaba baroh ar tylli ki kynhun ki la ïalehkai bha bad lyngba da ki jingtbit bad pyni shisha ïa ka sap kum ki nongïalehkai ka la pynhun ïa ki khmat jong ki nongpeitkai kiba dei ki ‘riew ieid ban peit peit ïa ka lympung kynjatbol.
Ha ka jingïalehkai jong ka kyllastep, baroh ar kynhun ki la ïalehkai bha bad ki la ïa pyrshang ruh ban ïa knieh ïa ka bol ban ïoh ban thep hapoh ka kol hynrei da ka jingtbit ki nangap kol kim lah ban pynurlong satai. Hynrei katba ki minit ki la nangïaid ki nongïalehkai jong ka Selajong FT ki ïoh nyngkong eh ïa ka kabu ban thep kol kata ha ka minit kaba 20 lyngba u Reson Malngiang bad kumjuh ruh ha ka minit kaba 34 lyngba u Sheen Sohktung.
Lyngba kine ki ar tylli ki kol na ka liang ka Lamare SC ruh kam shym la kynran dien noh hynrei ka dang ïa khun hi kat la hi bor bad dei ha ka minit kaba 39 ka la ïoh ban pynphai ïa ka shi kol lyngba u Nelson Rymbai nangta shuh shuh ka Selajong FT ka la ïoh biang sa kawei pat ka kol lyngba u Chestar Lyngdoh ha ka minit kaba 44.
Kumta ha ka jingïalehkai jong ka kyllastep ka Selajong FT ka la tam noh da 3 – 1 kol pyrshah ïa ka Lamare SC.
Ha ka jingïalehkai jong ka kyllamiet pat ka jingïalehkai ka la nang shongshit shuh shuh ha kaba ka Lamare FC ka la pyrshang ban ñion tyngeh pyrshah ïa ka Selajong FT ban ïoh pynphai ïa ki kol hynrei da ka jinglah jong ki ‘rangïalehkai jong ka Selajong FT kim shym la lah ban pynurlong, hynrei watla kata ruh ki la ïakhun khlem shongthait bad dei ha ka minit kaba 52 ki la ïoh biang sa ka kol kaba ar lyngba u Brolington Warlarpih.
Namarkata, ka jingïalehkai hapdeng kitei ki ar tylli ki kynhun ka la kut noh da kaba ka Selajong Football Team ka la rung sha ka phainal lyngba ka jingjop noh da 3 – 2 kol pyrshah ïa ka Lamare Football Club.
