Da kaba plie ïa ka ‘Shyngoid Khyllung’ Jisu, rakhe kaRBDCCC ïa ka ‘Pre Christmas’ ha sor Nongpoh 

Nongpoh, Nohprah 17: Kum ka jingap khmih lynti ha satlak ka pyrthei halor kata ka jingwan longbriew U Khun u Blei sha kane ka pyrthei ba la tip kum kata ka Christmas bad ban ïa snoh kti lang ban pdiang burom ïa kane ka sngi kyrpang, Ka Ri Bhoi District Christmas Celebration Committee (RBDCCC) ha ka janmiet sngi Thohdieng ka lah ban plie paidbah noh ïa ka Shyngoid jong u khyllung Jisu bad ruh ka jingpynriam ïa ka sor Nongpoh shi bynta ka jingrakhe ïa ka Christmas bad ban pdiang burom ïa u snem ba thymmai.
Ïa kane ka Shongoid u Khyllung Jisu bad kitei ki jingpynriam da ki rong ki rup la wan ban plie paidbah da u Assistant parish Priest ka Nongpoh Parish, u Fr. G. Jalong ryngkat ka jingdon lang u MLA ka Nongpoh, u Bah Mayral Born Syiem, ka Kong Marian Maring, u President ka KSU, North Khasi Hills district, u Samla Ferdynald Kharkamni, u President ka HNYF, u Bah Marcus Marten, u Bah S. Syngkli, Working president ka NPP Nongpoh Block, u Bah S. Mynsong, Rangbah Shnong ka Nongpoh ryngkat kiwei ki riew rangbah.
Kum ka jingpynkhreh ban rakhe ïa ka Christmas la pynphuh pynphieng ruh ïa kane ka jingplie ïa ka Shongoid u Khyllung Jisu da ka jingdon lang ki Aspirant Auxilium Convent Mawtnum, ki Seiborlang Choir na Nongpoh Pairsh kiba la ai ki jingrwai Christmas babang ba bathiang bad ryngkat kiwei kiwei ki riew rangbah, ki longkmie bad ki Longkpa lem bad ki khun samla ka thaiñ Nongpoh.
Ha kane ka sngi la sam ruh ïa ki jaiñ blanket sha ki 55 ngut ki longïing baduk ka thaiñ Nongpoh ba la ai sngewbha Christmas da ka Longïing jong ka Kong Marian Maring bad u Paralat Toor.
Lyngba jong kane ka janmiet la ai jingkren ruh naduh u Fr. G. Jalong, u MLA ka Nongpoh, u Bah Mayral Born Syiem, ka Kong Marian Maring, u president ka KSU, u Samla Fedynald Kharkamni, u Bah S. Syngkli bad kiwei halor ka khubor Christmas bad ryngkat ki jingsneng ki jingkraw ba ngin pdiang ïa kane ka Christmas bad snem thymmai da ka mysiem jong ka jingieit bad ka jingkmen bad ba ngin long ruh kita ki atiar kiba wan rah jingsuk bad kiba don ka jingkitkhlieh ha ka jingim ba kynja mynsiem bad wat ha ka imlang ka sahlang.
Kitei ki nongkren ha kane ka janmiet ki la pynphriang ïa ka khubor jong ka jingieit bad ka jingkmen ha kaba ka dei ka aiom kaba ngi ap khmih lynti ïa kata ka jingwan longbriew u khun U Blei bad kum ki khun Khristan ngi dei ban long kita ki nongrah khubor babha kumba ki Angel ki la wan rah ïa kata ka khubor bha ban kha ïa u Khyllung Jisu kaba phalang ba ngi dei ban long kita ki nongrah khubor ba bha na ka bynta ka ing ka sem, ka imlang ka sahlang bad ha ka jylla hi baroh kawei.