Shillong, Nailur 23: Na ka bynta ban pyrshah ïa u drok, na ka liang jong u wei u samla kane ka thaiñ u la rai ban ïaid kjat bad une u samla u dei u Khasi bad u la thmu ban ïaid kjat na Itanagar sha Shillong.
Une u samla Khasi u dei uba la tip kyrteng da u Welkinstone Shadap u la pyntip paidbah mynta ka sngi ha Shillong Press club ba un ïaid da ka kjat na Itanagar sha Shillong.
Ha kaba ïadei bad kane haba kren bad ki lad pathai khubor une u samla u la pyntip paidbah ba u thmu ban ïaid da ka kjat na Itanagar sha Shillong kum shi bynta ban rah ïa ka khubor pyrshah ïa u drok ban sdang naduh ka 30 tarik Nailur 2024.
Une u samla u la ïathuh ba u la ïaid teng da ka kjat na Guwahati sha Shillong bad kumjuh na Nongstoiñ sha Shillong bad kane ka dei ka sien ba nyngkong ba un ïaid kjat shabar ka jylla bad kane ka jingïaid kjat jong une u samla kan kynthup kumba 50 km ha ka shi sngi bad yn pyndep haduh 8 sngi lait noh ha ka sngi u Blei.
