Da ka Workshop pynlong ka NCW bad MBB ban kyntiew ïa ka ïoh ka kot ki longkmie riewlum

Shillong, Naitung 08: Ka National Commission for Women (NCW) bad Meghalaya Biodiversity Board (MBB) ki la sdang ïa ka regional workshop ba ar sngi halor ka Non Timber Forest Produce (NTFP) ha nongbah Shillong mynta ka sngi ban plie lad ïa ka jingkiew ka ïoh ka kot kaba ïaineh bad kyntiew ïa ka jingseng kam lajong ha ka nongrim NTFP hapdeng ki longkmie riewlum ha ka thaiñ.
Ha ka jingsdang ïa ka Regional Capacity Building Workshop bad Conference Chairperson, NCW, ka Rekha Sharma ka la ban jur halor ka jingkongsan jong ka jingkiew ka jinglaitluid ha ka ïoh ka kot ïa ki longkmie ha nongbah Shillong.
Ka Sharma ka la pynshlur ïa kiba ïashim bynta ba kin pyndonkam ïa ki jingdon jingem ka mariang ha ka thaiñ, kaba don palat 3000 jait ki jingthung ha ki khlaw, ba kin tei ïa ki kam ba ïaineh. Ka la ong ba kane ka workshop ka long kum ka jingplie lad ïa ka jingïaineh jong ka ïoh ka kot bad ka jingpynkupbor ïa ki longkmie riewlum. Ka NCW ka la sdang ïa ka sienjam bathymmai ban kyntiew ïa ki sap jong ki longkmie riewlum kiba sah hajan ki jaka khlaw ba kin seng ïa ki kam lajong ne ba kin trei ha ki kam NTFP, ka la ong.
U R. S. Gill, IFS, PCCF, bad HoFF u la kdew sha ki lad ban lap shuh shuh ïa ki mar khlaw ba lah ban pynïaid ha ki ïew hapoh bad shabar ri, bad u la kdew ruh sha ka bynta jong kane ka workshop ha ka jingkyntiew ïa ki sap.
Ka Meenakshi Negi, Member Secretary jong ka NCW, ka la ban jur halor ka jingdonkam ban kyntiew ïa ka jingseng kam lajong da ki longkmie riewlum ha ka thaiñ shatei lammihngi kiba don nongrim ha ka NTFP. Ka la ong ba lyngba ka jingïalam lynti, ka jingai jingmut bad ka jingkyntiew ïa ki bor treikam, ki sienjam ba la shim da ka NCW, ki longkmie ki lah ban riewspah ha ki kam ba ki trei.
Ïa kane ka prokram la pynlong ha ka State Convention Centre ha Shillong, Meghalaya, ha kaba la wan ïashim bynta da ki nonglum, ki nongkhaïi ïa ki dawai tynrai, ki nongsumar tynrai, ki self – help group, ki nonglum NTFP bad ki nongrep na Meghalaya bad ki jylla ba marjan.
Ha ki bynta teknikal la don ki jingai jingmut na ki riewshemphang – Alka Bhargava, Dimpy Bora bad Pravin Bakshi, kiba la ïakren shaphang ki ïew bad ka jingpdiang ïa ka teknoloji ha kaba ïadei bad ki mar NTFP.
Ka workshop ka la peit bniah ïa ka jingpynkhreh ïa ki rukom treikam ban pynïasoh ïa ki ïew, kyntiew ïa ki kam khaïi lyngba ka jingpdiang ïa ka teknoloji, bad ka jingpynkhreh ïa ki kam ban pynbeit ïa ki jingeh kiba ïadei bad ka jingkhaïi ïa ki mar. Kiba ïashim bynta ki la don ruh ka jingïamir jingmut ba la pynlong da ki riewshemphang bad kiba ïadon bynta ha ki kam kiba kynthup ki State Women Commission, Forest, ki tnad AYUSH, bad ki riewshemphang ha ki kam bapher bapher. Kane ka jingïatreilang ka thmu ban plie lad ïa ka ïoh ka kot kaba ïaineh bad kyntiew ïa ka jingseng kam lajong ha ka nongrim NTFP ha ki longkmie riewlum ha kane ka thaiñ.
Ka sngi ba nyngkong jong kane ka prokram ka la sakhi ïa ka jingwan ïashim bynta da 250 ngut ki briew ba kynthup ki self-help group, ki nongseng kam lajong, ki nongsumar tynrai, bad ki NGO na East Khasi Hills, Jaiñtia Hills bad Ri-Bhoi. Ha ka sngi baar yn don ki bynta shaphang ki jinglong jingman jong ki ïew, ka jingpdiang ïa ka teknoloji, ki jingeh ha kaba ïadei bad ki jingkhaïi mar bad ruh ka jingkyntiew ïa ka kamai kajih.