Da ka ‘wheelchair’ ai u Bah Banteidor ia ka khynnah pule bym lah ban ïaid ha Mawsna

Shillong, Naitung 08 : U Bah Banteidor Lyngdoh, MLA ka Mawkynrew bad Myntri ba dei khmih ïa ka tnad kam rep ka Sorkar Jylla ha ka 07 tarik u Naitung, 2022 u la aiti da ka wheel chair sha kawei ka khynnah skul jong ka Raid Lynshiang SSA bad RMSA School, Mawsna kaba don jingduna ha ki dkhot met kata kaba bym lah ban ïaid.
Une u MLA u la noh synñiang ruh shi lak tyngka sha ka skul na ka bynta ban shna ïa ka lynti ïaid kjat sha katei ka skul na ka bynta ban pynsuk ïa ki khynnah kiba don jingduna ha ki dkhot met bad kiwei pat ki khynnah skul.
Ha kane ka sngi, u la noh synñiang ruh da ki tiar ïalehkai kum ki bol, ki carrom board bad kiwei pat. U la pynpaw ruh ba un ai ar tylli ki computer, kawei ka printer bad kawei ka projector sha kane ka skul.
Haba kren ha ka jingïalang, u Bah Banteidor u la ong ba ka jingangnud jong u ka long ban kyntiew ïa ka Constituency ha ka liang ka pule puthi bad ka jingwanrah ïa ki surok.
“Haba nga la long u MLA kane ka Constituency nga la ïohi ïa ka rukom jinglong jingman ki skul ha ka rukom kaba i sangsot. Ki kamra klas ki long khapngiah bad kiba la mang mar 20 ngut hap shong 60 ngut “, u la ong.
U la pyntip ba ka surok na Lad Mawkhoh sha Nohron shen yn pyntrei noh ïa ka lyngba ka skhim PMGSY. U la ong ba u kwah ba ki surok ha Constituency jong u kin long kiba bit ba biang.
Da kaba kyntu ïa ki nongshong shnong ban ïatreilang, u la ong ba dei tang lyngba ka jingïatreilang bad ka jingïasnoh-kti lang kaba lah ban pynkiew sha khmat ïa ka Constituency hi baroh kawei.
La ia donlang ha kane ka sngi da ki nongïalam shnong, ki bor pynïaid skul, ki khynnah pule lem ki nonghikai nalor kiwei pat.