Jowai, Nohprah 12: Ki bor pynïaid ka West Jaiñtia Hills Karate Do Association, Jowai hadien bala pynkhie im biang ïa ka jingïalehkai Karate hapoh ka District, ha kane ka 12 bad ka 13 tarik Nohprah kala pynlong ïa ka West Jaiñtia Karate Do Championship-2025 ha Yungwalieh ka Dobar shnong Loompyrdi Iongpiah.
Na ka liang ka tnad Directorate of Sports & Youth Affairs, Meghalaya Shillong kala don bynta lang ban pynlong ïa kane ka jingïakop kaba ïaidbeit ïaid ryntih.
Ha kane ka sngi la wan ban donlang naduh u Bah R.L.Bimee Suwer, Rangbah Shnong Loompyrdi Iongpiah kum u kongsan, nalor u Bah Alan Niangti, President WJHKA, Jowai, u Bah Manbha Kynjin, General Secretary WJHKA, Jowai, u Bah Pynioo Phira, Chief Instructor, u ma Ribeit O Pde, Organisng Secretary ba dkiwei de kiba la shah khot sngewbha.
U Bah Alan Niangti, President WJHKA, Jowai haka jingkren kum ki shongknor ula pynkynmaw ïa ka kyrteng bad ka nam jong u Stephan Leong uba long uwei na ki nongseng ïa kane ka kam ïalehkai Karate hapoh ka ri Lum Jaiñtia kumjuh ha ka Jylla Meghalaya ha ki snem kiba la leit.
Katba u kongsan Bah R.L. Bimee Suwer ula ai ka jingïaroh kaba khraw eh ïa ki longkmie ki longkpa kiba la pynshlur ïala ki khun ki kti jong ki ban wan ïashim bynta ha kane ka jait jingïalehkai, ula ai mynsiem ïa ki nongïashim bynta baroh naduh ki khynnah haduh samla ba kin don ïala ka akor ka burom.
Ula ong ruh ka jingpynlong ïa kane ka jingïakop ka long shi bynta na ka thong jong ka seng ban ailad ïa ki nongïashim bynta ban pynpaw pyrthei ïa ki sap ki phong ba ki don, ha ka juh ka por kum ki nongïashim bynta kin sngewthuh ïa ki jingduna ha ka rukom ïalehkai jong ki, khnang ba kin lah ban pynjanai shuh shuh ha ki por ban wan.
Ha kane ka sngi u kongsan Bah R.L.Bimee Suwer, nalor ki dkhot ka WJHKA, Jowai bad kiwei kila sam ruh ïaki Medal sha ki khynnah kiba jop ha ki kyrdan jingïakop bapher bapher ïa kiba la bynta katkum ka rta jong ki kiba kynthup ïa ka Kumite bad ka Kata.
