Shillong, Naitung 25 : Ka ïing bishar ha ka Lah Sngi U Blei ka la pynmih hukum ban kem ïa u Bernard N Marak MDC ba la tip da ka kyrteng sin kum u Rimpu da kaba ai syndon da ka Warrant kaba khlem lah ban jamin hadien ba la lap da ki pulit ba u pynïaid ïa ki kam awria ne pynlong ïa ka ïing basa jongu kum ka Brothel. Ha ka jingkhynra ki pulit na katei ka ïing basa ki la kem haduh 73 ngut ki briew bad ïoh ban pyllait im 5 ngut ki khynnah rit.
“ ïa kane ka warrant bym lah ban jamin ban kem ïa u Bernard la pynmih da ka ïing bishar Chief Judicial Magistrate, Tura.
U Bernard uba dei u Chairman jongka seng lehnoh ba la dep pynwai noh ka ANVC-B u la jah rngai naduh ka miet ba ki pulit ki leit khynra ïa ka ïing basa jongu ha kaba ym tang ba kem bad ïoh pyllait im ïaki khynnah rit hynrei ki la ïoh kurup bun bah ka kyiad, ki condom, ki kali na ka Rimpu Bagan ka kyrteng katei ka ïing basa jongu.
U pyrshang ban sait khuid ba u khlem pynïaid ïa ki kam awria ha katei ka ïing basa jongu da kaba tei pop ba ka dei ka jingtieng jong u Myntri Rangbah ba ka BJP ka la nang khlaiñ, hynrei kaei kaba la lap pat da ki pulit bad ïoh ruh ban ring video ka long kaba ym lah shuh ban len ïa kaei kaba u la pynïaid ha katei kaïiing basa jongu.
U la ai daw ruh ba ym dei ba u phet rieh ne tieng ïoh shah kem ha ki pulit hynrei u tieng da kaba kynnoh ba u myntri rangbah u phah siat iap ïa u. Ki pulit jongka West Garo Hills pat ki pynshisha ba ki la ïoh ban pynpra ia ka ktem awria ha Tura bad ïoh ban pyllait im 5 ngut ki khynnah rit bad kem 73 ngut ki briew kiba ïadonkti ha ki kam awria.
