Shillong Jylliew 04 : U Myntri ka tnad Animal Husbandry & Veterinary u Bah Sanbor Shullai u la pyntip ba la dep phah ïa ka jingtyrwa sha ka sorkar jylla ban seng noh ïala ka jong ka Veterinary Science University ha Kyrdemkulai, Ri Bhoi District ha kaba jinglut jingsep ban tei ïa kane ka skulbah kan kot sha ka T.400 klur.
Haba kren bad ki lad pathai khubor, u Bah Sanbor u la ong, “Ki samla ka jylla jong ngi ki hap ban leit pule sha kiwei pat ki jylla bad ka jaka kaba jan tam kadei ka Guwahati bad ynda la don la ka jong ka University kan pynsuk ïa ki samla khamtam eh ïa kito kiba wan na ki longing baduk.”
U la ong ruh ba ha katei ka skulbah yn lah ban pynrung haduh kumba 1000 ngut ki samla pule bad lada jia ba duna ki samla pule na ka jylla ban pyndap ïa ka ba la pynkhreh lah ban plie lad lang wat ïa kiwei pat ki jylla ba kin wan ban pule.
U Myntri u la ïathuh ruh ba ka jingtei ïa katei ka University yn pynlut da ka sorkar pdeng bad ïa katei ka jaka pule pat yn khmih da ka sorkar jylla katba kan don pat ka kynhun jong ka sorkar pdeng kaban wan khmih bniah ïa ka jingpyntreikam ïa katei ka projek.
Ha kawei pat ka liang u Bah Sanbor Shullai u la ïathuh ba ka tnad Prison kala pynkhreh ban tei ïa ka Central Jail ha Mawdiangdiang ha ka jaka kaba 25 akar bad ïa katei yn ïoh na ka tnad Urban Affairs bad ynda la dep tei ïa ka Central Jail, ka tnad Prison kan sa aiti noh ïa ka jaka kaba don ka Jail ha Jail Road sha ka Urban Affairs.
U la ong, ba ïa mynta ki dang ap ban wanphai noh u Myntri ka tnad Urban Affairs u Bah Sniawbhalang Dhar na Dubai ban pyndep noh ïa ki kot ki sla khnang ba yn ïoh ban phah ïa ka jingtyrwa sha ka sorkar pdeng ban mang ïa ka tyngka.
U Bah Sanbor u la ong, ha katei ka jail yn lah ban buh haduh 5000 ngut ki koidi kata 2500 ngut ki shynrang bad 2500 ngut ki kynthei.
“Lada ka sorkar pdeng ka mang ïa ka pisa ban shna ïa ka University ne ïa ka Central Jail, ngan leit khmih bniah hi dalade ban pyntikna ba ka rukom tei ïa ki kan long kaba skhem,” la bynrap shuh shuh utei u Myntri.
