Nongpoh, Naiwieng 10: Ban kynmaw burom ïa ka lyngkhuh sngi kha ba 150 snem uwei na u nongïalam ba khraw ka ri u Sardar Vallabhbhai Patel bad uba la tip ruh kum u ‘The Iron Man of India’, ka Directorate of Sport and Youth Affairs ka jylla ha ryngkat ka jingïatrei lang bad ka My Bharat, Meghalaya lem bad ka kynhun NSS mynta ka sngi ki la pynlong ïa ka jingïaid kjat paidbah ba la tip kum ka ‘Unity March’ kaba la sdang na Indoor Stadium Umlyngkdait bad pynkut pat ha phyllaw ka Ri Bhoi College.
Kum ban pynpaw, kane ka Unity March ka dei kawei na ka Campaign ne ka jingïalap ba la tip ruh kum ka Sardar@150 Unity-Campaign ha ka ba la la pynlait paidbah ha ka 6 tarik u Risaw 2025 da u Dr. Mansukh Mandaviya kum u myntri ka sorkar pdeng ba peit ïa ka tnad Youth Affairs and Sports, kaba long shi bynta ban kynmaw burom ïa ka jingdap 150 snem u u Sardar Vallabhbhai Patel, uba dei uwei na u nongïalam ba khraw ha ka ri.
La pynpaw paidbah ruh ba ka thong jong kane ka Unity March ne ka Campaign ka dei ka thong ban wan rah ïa kata ka mynsiem jong ka jingïatylli, ka mynsiem ban ïa khun ban kyntiew ïa ka ri bad ruh ban don kata ka jingkitkhlieh na ka bynta ka bha ka miat jong ka imlang ka sahlang.
Haba pynlong ïa kane ka Unity March kab la tip ruh ka Sardar@150 Unity Campaign la wan ban shim bynta da u Bah A.L Hek, u myntri sorkar barim bad MLA ka Pynthor Umkhrah kum u kongsan bad u Bah Mayral Born Syiem MLA ka Nongpoh kum u Symbud kongsan. Kiwei kiwei kiba la ïa don lang ha kane ka sngi ki kynthup ïa u Abhilash Baranwal Deputy Commissioner ka Ri-Bhoi, Bah O Massar, Additional Superintendent of Police ka Ri Bhoi, ka Kong B Rani, ADC ka Ri-Bhoi, u Michael Mate, Director ka My Bharat, Meghalaya bad la shim bynta ruh da ki samla pule ka skulbah USTM da ka rwai ka siaw ban pynphuh pynphieng ha kane ka sngi.
