Da ka tulop ba thymmai yn siew ka sorkar sha ki nonghikai khlem ka Pay Scale naduh u ïaiong

Shillong, Rymphang 12 : Ka Sorkar Meghalaya kala pynmih ka jingpynbna ba kan pyntreikam da ka tulop ba thymmai ne ka Structured Pay Framework (SPF) na ka bynta baroh ki Nonghikai kiba ioh tulop beit thik ne Fix Pay ne kiba khlem ioh da ka Pay Scale ka ban sdang naduh u bnai Iaiong mynta u snem. Ka jingthmu ka long ban pynthikna ba ka rukom siew tulop kaba shai, bad ka jingshakri kaba thikna ha baroh ki skul ha Jylla.
ïa kane ka jingpynbna, la pynmih da ka Tnad Pule Puthi ha ka 12 tarik Rymphang, ka ong ba kane ka rukom siew tulop ba thymmai kan sdang treikam naduh ka 1 tarik Iaiong, 2026.
Kane ka tulop thymmai kan treikam ïa ki nonghikai SSA (LP &UP), Nonghikai RMSA (Secondary& Higher Secondary), Nonghikai Adhoc, 4th Teacher (UP), Nonghikai Science & Hindi bad ki Nonghikai Pre-Primary kiba ju shim ïa ka tulop ba la buh beit thik ba kin ïoh (fixed).
Ha kane ka jingpynbeit ba thymmai, ki Nonghikai kin ïoh ïa ka Base Pay ba la pynshong nongrim kat kum ki snem jong ka jingshakri jong ki, ka Composite Annual Increment (CAI) ba 30% na ka Base Pay, ka Centralised Provident Fund (CPF) bad 8 % ka synniang na man ki nongaikam bad nongtrei. Ka Increment ba man u snem kan shong ha ka jingbishar ïa ka jingshakri da ki Headmaster, Headmistress lane Principal.
Kane ka tulop thymmai ka sdang :
21,000 haduh 22,680 tyngka ïa ki Nonghikai Lower Primary,24,250 haduh 26,190 tyngka ïa ki Nonghikai Upper Primary, 34,25 haduh 36,990 tyngka ïa ki Nonghikai Secondary, 36,500–39,420 tyngka ïa ki Nonghikai Higher Secondary tangba ia kito kiba la hikai la palat 28 snem ka tulop jongki kan kham heh shuh shuh.
Ha kawei na ki kyndon ba kongsan, ki Nonghikai SSA bad RMSA mynta kin ïoh ïa ka jingpynthikna ba ka jingshakri jong ki kan ïai bteng haduh da kynjoh ïa ka rta ba 58 snem, ka ban shong pat ha ka jinghun ïa ka jingtreikam jong ki bad ka jingkhlaiñ ka met ka phad. Hynrei, ka jingpynbna ka pynshai ba ym dei ban shim ïa kane ka jingpynbteng ïa ka kam kum ka jingpynskhem ïa ka kam lane ai ïa ka kyrdan nongtrei Sorkar.
Ki Nonghikai ha kane ka jingpynbeit, kin ym don hok ban dawa ïa ka jingsiew ba mar katjuh bad ka tulop Sorkar lane ki allowance, bad ki dei ban pyntreikam ïa ka jingïateh kular bad ki bor ba dei khmih.
ïa ka tulop ki nonghikai SSA, RMSA bad 4th Teacher yn sa pynthep beit beit sha ki Bank Acccount jong ki shimet shimet. ïa kiwei pat ki nonghikai, ka jingphah pisa beit beit sha ki ka donkam ïa ka No Objection na ki Managing Committee ki skul.
Ka sorkar ka la bat ruh ïa ka bor ban pynbeit ryntih ïa ki skul bad ka jingpynkynriah kam ïa ki nonghikai ban pynbiang ïa ka jingdon nonghikai bad ka jingdon ki khynnah skul.
ïa kane ka jingpynbna la pynmih da u Vijay Kumar Mantri, Commissioner & Secretary ka Tnad Pule Puthi ka Jylla.