Nongpoh, Naitung 15: Kum ka jingkyrshan bad ka jingïatyrong lem ïa ki jingdonkam kawei na ka shlem ai jingpule ki khynnah skul, ka BJP Ri Bhoi ki la shim ïa ka sienjam ban synñiang lem da ka Top Um sha kawei ka skul pule kaba don ha ka shnong Mawbsein ha Ri Bhoi District.
Kane ka skul pule ba la noh synniang ka BJP da ka top um ka dei ka skul Diamond UP School Lummission Mawbsein ba la seng ïa ka ha u snem 2022, ha kaba mynta ka la don haduh Class-8 bad ki don 90 ngut ki khynnah skul.
Ha ka jingïalam u President ka BJP Ri Bhoi District, u Bah Sen Thabah bad lyngba ka jingshim khia jong u, ka BJP Umroi ka la lah ban synñiang da ka Top um kaba long kawei na ka jingdonkam katei ka skul pule.
Haba leit ban aiti ïa katei ka Top Um sha katei ka skul, la don ryngkat naduh ki dkhot ka Managing Committee, ki nonghikai bad kynthup ruh ki khynnah skul, kiba la pynpaw ïa ka mynsiem jong ka jingkmen halor kane ka jingkner lem kane ka party na ka bynta ki jingdonkam jong katei ka skul.
Na ka liang u Bah Sen Thabah kum u President ka BJP Ri Bhoi, u la pynpaw ba ka daw kaba la pynong ïa ka paty BJP ban ai lem da ka top um sha Katei ka skul, ka dei hadien ba ka la ioh jingtip ba katei ka skul ka dang don hapdeng shibun ki jingduna bad shi bynta ban ïarap lem ïa kane ka skul ka party ka la synñiang ka top um.
Shuh shuh, u la pynpaw ruh ba kane ka jingai ïa ka top um ka long kawei na ka jingai barit eh bad u khmih lynti pat ba kan ai jingmyntoi na ka bynta ki khynnah skul bad kum u nongïalam ka BJP u la ai mynsiem ruh ba kin dang ïatrei lang nangne shakhmat na ka bynta ban kyntiew lem ïa katei ka skul kaba don hapoh ka them Ri Bhoi.
