Shillong, Risaw 17 : Ka Meghalaya Football Association (MFA) ha ka sngi Thohdieng ka la pdiang burom ïa ki thei ïalehkai phutbol ka Ri kiba la poi hynin ka sngi ha nongbah Shillong ban aireng ha Tri-Nation Women’s Football Tournament kynthup ka Iran bad Nepalkaban long ha madan JN Stadium Polo, Shillong naduh ka 21tarik Risaw haduh ka 27tarik une u bnai.
La lamkhmat ïa kane ka jingpdiang burom da u President ka MFA, Bah Hamletson Dohling ryngkat ki dkhot ha kaba ki la ai sngewbha da ka thohriaw stem sha baroh ki thei ïalehkai bad da ka ryndia ïa ki bor pynïaid jong ka kynhun.
Na ka liang u Bah Hamlet ha ka prokram pynkup burom kaba lyngkot u la ai ka jingkitbok ïa ka kynhun kaba pynkhreh mynta ban aireng pat ha ka AFC Women’s Asian Cup kaban long ha Australia ha u 2026.
“Na ka liang ka MFA bad ki paidbah ka Jylla hi baroh kawei ngi ai ka jingkitbok ïa ka kynhun ïalehkai ka ri kiba la wan iuhkjat bad shim bynta ha kane ka lympung ïalehkai. Ha kajuh ka por ngi sngewkmen bad ai khublei kyrpang ïa ka kynhun ka Ri ka la ïoh ban rung sha ka lympung ïakhun kaba heh ha dewbah Asia, ka AFC Women’s Asian Cup kaban long la shem snem ha Australia,” u la ong.
Shuh shuh u la ong ruh ba ka Synjuk ka phah ruh ka jingkitbok ïa ka kynhun ba kan lah ban ïalehkai bha ha kane ka jingïakhun kaban long pyrshah ïa ka Iran bad Nepal.
Kane ka jingïalehkai jong ki lai tylli ki ri kan long ha Jawaharlal Nehru Stadium, Shillong naduh ka 21tarik Risaw haduh ka 27tarik mynta u bnai.
Ka jingïakhun ba nyngkong jong ka India kan long pyrshah ïa ka Iran ha ka 21tarik mynta u bnai ha ka por 6:00 baje janmiet bud sa ka Iran ïa ka Nepal ha ka 24tarik bad ka India ia ka Nepal pat ha ka 27tarik mynta u bnai hi.
