Shillong, Naitung 20 : Ka sorkar jylla ka la thung da ka Task Force ban thaw ki lad ki lynti kumno ban weng ïa ki jingeh kiba mih na u ñiut ha ka sor Jowai ka nongbah jongka West Jaintia Hills District.
ïa kane la ïathuh da ka Meghalaya High Court ha ka jingbishar ïa ka mukotduma PIL jongka Synjuk Ki Waheh Chnong Jowai mynta ka sngi.
Ha ka hukum, jong ki arngut ki nongbishar ka ïing bishar la pynpaw ba ka la paw shai ba ka sorkar ka la pyrshang hi ban weng ïa ka jingeh na u ñiut na sor Jowai kaba ki paidbah ki la mad bad ïa kynduh hakine ki khyndiat bnai.
Hynrei wat la katta ruh ba ka sorkar ka dang pynkhreh da ka Task Force ban weng syndon junom ïa kane ka jingeh bad kumta ym pat pynwai ïaka mukotduma tad haduh ban da ïoh ïa ka jubab kaba shai kdar.
Ka hukum ka pynpaw ruh ba ka sorkar ka la jubab ba ka dang thaw ki lad ki lynti ban weng syndon junom ïa ki jingeh bad dei na kata ka daw la thung ïa ka Task Force ryngkat ki kyndon jingtreikam.
Na ka liang ka Jowai Municipal Board ruh ki la pynpaw ba ka jingpynkhreh ka dang ïaid shakhmat ban ym don jingthut shuh ka kam bret ñiut nangne shakhmat.
Ka ïing bishar kan shong bishar biang halor kane ka mukotduma hadien hynriew taiew bad ka kyrmen ruh ba kat haduh katei ka por ka sorkar ka la lah hi ban wanrah ïa ka kaiphod kumno ban weng syndon junom ïa kane ka jingeh.
