Da ka synduk metïap wanrah ka HITO ban pyni ba la ïap ka synshar paidbah

Shillong, Naiwieng 26: Ka Hynñiewtrep Integrated Territorial Organization (HITO) ka la sei da ka synduk metïap ha ka sngi Saitjaiñ ban pharshi ba ka synshar paidbah ka la ïap, ha ka jingïalang thang mobati kaba la pynlong ha ki phyllaw ka State Central Library kane ka jingïalang ka long ban pynpaw ïa ka jingsngewsih namar ka jingshah siat ïap ki san ngut ki Khasi ha ki pulit Assam kaba la jia ha ka 22 tarik mynta u bnai ha Mukroh ka la wanrah ruh da ka synduk metïap ban pyni ba ka synshar paidbah ka la ïap ha ka jylla.
Haba kren ha kane ka sngi u President ka HITO u Bah Donbok Dkhar u la ong ba kane ka jingwanrah synduk ka long ban pyni ba kane ka synduk metïap ka phalang ba ka synshar paidbah ka la shah pyniap ha kane ka sorkar.
U la ong ruh ba ka ka seng bad ki dkhot jong ka man ka sngi kaba ki mih sha madan ban ïakhun ïa ki mat ka jaidbynriew ki dkhot ka seng ki long kiba la khreh ban shah ïap bad ki synduk metïap ka la khreh lupa ruh namar ki la long kiba la khei1 dep ban aiti la ka jingim.
Shuh shuh u la ong ba ka jingjia ha Mukroh ym dei satia ban kynnoh sha ki pulit kiba pahara ha nongbah Shillong bad ïa ki magistrate namar ka jingshah siatïap jong ki para ri ha Mukroh ka dei namar ba ki heh pulit lada ki mon eh ban pynphai kuli ki tieng namar ka Cadre jong ki pulit ka dang dei lang bad jong ka Assam da kaba ai nuksa ïa uwei u heh pulit uba shah knieh ka suloi ha u heh pulit Assam.
“Ngi kynnoh ïa ki pulit bad ki Magistrate hynrei ha ka jingshisha dei namar ka sorkar hi kaba ym don mo ban ïada ïa ki paidbah ka jylla kiba shong ha ki jaka khappud,” u la ong.
U la ong ruh ba ki Khasi kim dei ki nongshong shnong ka India hynrei tang ki nongthep vote namar lada dei ki nong India ki kam pynroi kim dei ban kyrduh namar haduh mynta ym don umbam umdih kaba biang, ym don lynti synkien kaba biang.
“Nga kwah ban kren da kaba shai ba ngim dei ki nong India kiba pura hynrei tang ki nongthep vote namar ki sorkar ki kynmaw ïa ngi tang ha kane ka por,” u la ong.
Hadien ba ka seng ka la dep ba pynlong ïa ka jingïalang ka la pynlong ruh ka jingthang mombati.
La ïohi ruh ba ki riew paidbah ki la wan shim bynta ha kane ka sngi khamtam namar ba ka HITO ka kular ba ka jingïakhih jong ka ka long beit thik ban ïasnoh mynsiem bad ki nong Mukroh ym ban thaw jingkulmar namar lada mih ka huri hura u paidbah ruh un sa jynjar bad kumjuh ki khynnah skul ruh khamtam ha kane ka por ba ki khynnah ki don hapdeng ka eksamin ong uwei u riew rangbah ba ai ingkren ha kane ka sngi.
Ka seng ha shuwa ban pynlong ia kane ka jingthang mombati ka la leit ban aiti ruh ia ka dorkshas sha u Resident Commissioner ka Assam House ha Dhanketi ban dawa na ka sorkar Assam lyngba jong u ba ka shongsuk shongsaiñ ha ki khappud ka dei ban wan biang bad ba ka sorkar Assam ka dei ban khang kyrdep shuwa noh ïa ka Forest Beat House kaba don ha ki thaiñ Mukroh.