Shillong, Naiwieng 24 : Namar ka jingud jong ki paidbah ïa ka jingeh kaba khraw ba ki kynduh ha ka por Lyiur ban leit buh ïa kiba ieit ba thoin sha lum jingtep ha Lawmali, na ka liang u MLA ka Shillong North, Bah Adelbert Nongrum u la phah siang noh da ka surok dewbilat naduh lad surokbah ter ter shaduh ki lum jingtep jong ki Balang bapher bapher kiba don ha utei u lum jingtep.
Ïa katei ka lynti kaba la shna khnang tang ban ïaid ki kali ba kit ïa ka synduk metïap la plie paidbah da u MLA ha ka step 22tarik ha ryngkat ka jingdonlang ki nongïalam jong ki Balang bapher bapher.
Haba kren ha katei ka sngi, u MLA u la ong ba dalade u la ïohi katno ka jingeh ba ki paidbah ki kynduh haba ki leit ban ontep ïa ki baieit ba thoin ha ka por Lyiur khamtam eh ïa ka kali kit synduk metïap namar ka jingktieh ka lynti.
U ong ruh ba ïa katei u la kwah la slem ban phah shna noh hynrei namar ka jingwan noh ka khlam COVID bud pat sa ki jingkulmar bapher bapher hadien katei, kumta katei ka kam ruh ka la slem bad sahkut lang.
“Hynrei mynta ka sngi pat nga sngewkmen ban ïoh plie noh ïa kane ka lynti ba la shna kyrpang ban ïaid ki kali kit metïap bad ruh ïa ka lynti ïaid kjat ha kaba ki paidbah kin ym donkam shuh ban ïaid na ka ktieh ha ka por Lyiur,” u la ong.
Shwa kane, kiba bun ki nongïalam Balang ki la ai ka jingïaroh ïa utei u MLA uba la ïohi ïa ka jingeh ba ki paidbah ki kynduh haba ki wan ban ai khublei khatduh ïa kiba ieit ba thoiñ ha u lum jingtep Lawmali.
